Sverige katittoornissamut piareersarpoq

Sverigemi aatsaavissuaq kunngissamik arnanik katittoqartussaavoq. Sverigemi kunngikkormiut nuannarineqarnerat appariartuleruttortorlu.

Sverige minnerunngitsumillu illoqarfiit pingaarnersaat Stockholm ukiorpassuanngortuni kunngikkormiuni pisussat annersaannut piareersarsuataarpoq.

Arfininngorpat nalunaaqutaq 15.30 kunngissaq Victoria uissaalu Daniel Westling Storkyrkanimi Stockholmimiittumi katissapput. Europami kunngikkormiorpassuit naalagiaqataassapput, ulunilu arlalinni nalliuttorsiortoqassaaq nipilersortoqartarluni, nerersuartoqartarluni, ilasseqatigiittoqartarluni assigiinngitsorpassuarnillu pisoqartarluni.

Katinneerli nalliuttorsiornerinnaananilu, assuarnerinnaananilu kujasanartunik kjoleqarnerinnaanngilaq. Svenskip oqaaseqartartup oqaluttuarisaanermillu ilisimatuup Hermann Lindquistip nangaanani aamma katinneq oqaluttuarisaanermut pingaaruteqarnerarpaa.

– Sverigemi kunngikkormioqarnerup ukiut tusintit sinnerlugi oqaluttuarisaanerani taanna nalissaqanngilaq, aatsaavissuaq Sverigemi kunngissamik arnamik katittoqartussaanera innersuussutigaa,aatsaavissuarlu Sverigemi kunngissamik kunngikkormiuunngitsumik uinittoqartussaalluni kunngissaassutsini annaanagu.

Aatsaavissuarlu aamma svenskimik kunngikkormiuunngitsumik kunngissamut katinnermigut prinsinnguinnarani aammali hertuginngortoqartussaavoq.

Kunngikkormioqarfimmi qullersap Håkan Pettersonip katinnissamik aaqqissuussineq suliassarujussuusimanerarpaa, tamanna Sverigemi pisortatigoortuinnaanngitsumik aammali inuttut namminermut suliassarujussuusimammat.

Katinnissaq kunngikkormiorpalaartumik aammali innuttaasut naalliuttorsioqataanissaat eqqarsaatigalugu ataqatigiissaagassaasimavoq. Taamaattumillu Stockholmip illoqarfiata LOVE Stockholm 2010 aaqqissuussimavaa katittoornerup nalaani illoqarfimmi pisussat assigiinngitsorpassuit aaqqissuunnissaat eqqarsaatigalugu. Mannali tikillugu svenskit nalliutorsioriartukaallutik illoqarfiliakaasusat ilimagisatut amerlatiginiarunanngikkallarput. Billetsinillu tunisaqarpallarsimannginneq pissutigalugu Sverigemi qimuttuitsoqarfiup immikkut qimuttsuitsuliissamaraluarnini taamaatiinnarsimavaa.

Sverigei kunngissaq kisitsinerit kingulliit malillugit kunngikkormiut nuannarineqarnerat appariartornerata nalaani katittussaavoq. Assammiortaanerisa nalaannili kunngikkormiut demokratiskiunnginneragaasarnerat Sverigemi tusarsaarulersimavoq, katittoornissallu qalliartornerani kungikkormioqarnerup sumut iluaqutaanera pisariaqassusiallu tusagaasiuutit ilaasa eqqartortarsimavaat.

– Katittoorneq pinngitsoorani kunngikkormiut nuannarineqarnerannut sunniuteqassaaq, nuannarineqarneratami appariarsimanera uuttortaanertigut takutisinnaavarput. Isumaqarpungali katippata Sverigemi kikkut tamarmik nuannaaqataajumaartut, Aftonblademi kunngikkormiunik allaaserinnittartoq Jenny Alexandersson oqarpoq.

Powered by Labrador CMS