Per Ørum Kristendemokratiniilerpoq

Siornatigut folketingimi Konservativini ilaasortaasup Nunatsinnullu tunngasunik oqaaseqartartuusup Per Ørum Jørgensenip qulakkeerpaa Kristendemokratit 2005-imiilli siullerpaamik folketingimi isernissaat.

Per Ørum Jørgensen politikkikkut sulini nangissavaa Kristendemokratini, ukiuni kingullerni tapersersorneqarnerat qummut ammullu tulleriiaaginnavillugit pisarsimasoq. Assiliisoq: Polfoto/Jens Dresling.

Det Konservative Folkepartimit aninermini qaammat ataaseq qaangiuttorlu Per Ørum Jørgensenip Kristendemokratit Folketingimi ilaasortaatitaqalernissaat qulakkeerpaa. Konservativenit anisup maanna partiimi allami ilaasortaalernini ataasinngormat nalunaarutigaa.

- Uummatinni misigissutikka malillugit toqqaavunga. Arlalinnik toqqagassaqaraluarpunga, kisianni KD uannut tulluarnerupput, tusagassiuutinut nalunaarummini allappoq.

Per Ørum Jørgensen, Konservativit sinnerlugit siornatigut Nunatsinnut tunngasunut oqaaseqartartuusoq aammalu Namminersulernissaq pillugu Ataatsimiisitaliarsuarmi oqalliseqataalluartartutut ilaasortaasimasoq, KD-mi pisortat oqaloqatigisaqattaarpai, taakku sinnerlugit politikkikkut oqaaseqartartuussaaq aamma qinikkanut siulittaasuussalluni.,

- Danmarkip pisariaqartippaa partii iluaqutaalluarsinnaasoq Kristendemokratitut ittoq Danmarkimi naleqassuseq pillugu oqallinnerup aallarteqqinnissaanut, inuit eqqarsartaasiannik iliuusaannillu ataqqinninnginneq qalliinnarsiornerlu unammillerneqarniassammata danskit qanga pissuserisartagaannik tullimut asanninnertut ittumik, akisussaassuseqarnermik aamma inunnik, pinngortitamik aamma ataatsimoornermik ataqqinninnermik, Per Ørum Jørgensen oqarpoq.

Februaarimi Folketingimit sulinngiffeqarallarpoq imigassaq pillugu katsorsartinniassagami, ippassaammat politiinit unitsinneqarsimagami imigassartorsimalluni biilersimasutut, ,3-p aamma 1,4-p akornanni promilleqarluni. Maajimi Det Konservatine Folkeparti qimappaa - inuttaa naapertorlugu napparsimaviit pillugit isumaqatigiissinnaannginneq aamma atugarissaarnerulernissamut nutarterinissamut iliuuseqannginneq patsisigalugit, kisianni Jyllandip kitaani kredsformandia, John Sørensen, ilisimatitsivoq, Per Ørum Jørgensen folketingimi qinigaasinnaasutut soraarsitaasimasoq.

Powered by Labrador CMS