Atugarissaarnermut periutsimik issittumi pilersitsissaagut

– Innuttaaqativut amerlavallaat aalaakkaasumik inissisimapput ilinniagaqarnerlullutik, inigisaqarnerlullutik aningaasarsiornikillutillu, Inuit Ataqatigiinneersoq Naaja Nathanielsen Akileraarutinut Atugarissaarnermullu kommissionip Kalaallit Nunaanni siuariartornerup atugarissaarnerullu qulakkeernissaanut oqallisissiaanut oqaaseqaatitut oqarpoq.

– Imaanngilaq ajunngitsoq inuit tamakkua kiffaanngissuseqarmata piviusunillu toqqaanissaminnut periarfissaqarlutik, Naaja Nathanielsen oqarpoq, taamaattuillu issittumi atugarissaarnermut periutsimik tikkuaavoq, skandinaviamiut atugarissaariaasiattut ittuunngitsoq, Kalaallit Nunaannili ullumikkut atugassarisanik aallaavilik: Isorartooq innuttaasut ikittut, pinngortitap pisuussutai aammalu siuariartorneq pitsaanerusumik ilinniagaqarnermik sulisunillu unammillersinnaasunik tunngavilik.

Akileraarutinut Atugarissaarnermulu kommissionip saqqummiiussaa, partiinit naalakkersuisooqatigiinnit Inuit Ataqatigiinnit, Demokraatinit aamma Kattusseqatigiit Partiiannit iluarisimaarluarneqartoq, tunuliaqutaralugu partiit ataatsimut siunissarput pillugu oqallitsitsiniarput. Oqallinnermilu aallaaviussaaq "Issittumi pigissaarnermut periuseq".

– Pisortat karsii tatineqaleraluttuinnarput, Demokraatineersoq Niels Thomsen oqarpoq, taassumalu tikkuarpai utoqqaat amerliartornerat aammalu amerlavallaat piginnaasaqartitsisumik ilinniagaqarsimannginnerat. Ataaserlu qularnartoqanngilaq: Uninngaannarnissaq periarfissaanngilaq, taamaattumillu annertunerusumik atugarissaarneq pilersinniarlugu aaqqissuusseqqittoqartariaqarpoq.

Partiit naalakkersuisooqatigiit pingasut qaammatini aggersuni inuiaqatigiit atugarissaartut siunissami kissaatigisavut pillugit innuttaasunik tamanik oqallititsitsiniarput. Sinerissami innuttaasunik ataatsimiititsinerit, tusagassiorfinni oqallisissianik saqqummkiussinerit aammalu inunnik soqutigisaqaqatigiinnillu ataasiakkaanik attaveqarnerit, tassa oqallinnermik pilersitseriaasissat ilaat.

Akileraarutinut Atugarissaarnermullu kommissionip isumaliutissiissutini 2011-mi februarimi saqqummiutissavaa, tamasumalu tungaanut partiit naalakkersuisuusut innuttaasuni ilisimasanik isiginninnernillu katersiniarput, partiit inassuteqaatit tunuliaqutarlugit iliuuseqarsinnaaniassammata.

Eqqissiinnaritsilu: – Akileraarutinut akitsuutinullu isummertoqassappat aatsaat 2011-mi februaarip kingorna tamanna pissaaq, partiit pingasut ataatsimut oqaaseqaamminni oqarput.