Kujataani asimi ikuallanneq
Qatserisartut Kujataata annersaaneersut suli pinngortitami ikuallanneq annertooq qatserlugu ulapputigaat.
Annonse
Nunaqarfiup Ammassiviup akiani qaqqami sisamanngormat unnukkulli ikuallattoqalerpoq.
Ikuallanneq sumik peqquteqarnersoq politiit ilisimanngilaat, ikuallatsitaasimagunnanngilarli.
– Ikuallanneq qanoq ililluni aallartissimanersoq oqaatigineqarsinnaanngikkallarpoq, pinngortitarli panertorujussuuvoq, Jakob Møller Nanortallip politiivineersoq oqaluttuarpoq.
Sisamanngormat unnukkut neriffiup nalaani Nanortalimmi politiit asimi ikuallattoqaneranik kalerrinneqarput.
– Ikuallanneq qamingajakkaluarparput. Ajoraluartumilli ikummarisseqqippoq massakkullu ulluni marlunni ikumasimalerluni. Qatserisartut Nanortalimmeersut, Qaqortumeersut Ammassivimmeersullu massakkorpiaq ikuallanneq qaminniarlugu ulapputigaat, Jakob Møller oqaluttuarpoq.