Kinguaassiutitigut kannguttaatsuliorneq Amnestyp ermumanartoqartippaa
Nunat tamalaat inuit pisinnaatitaaffiinik suliniaqatigiiffiata ukiumoortumik nalunaarummini Kalaallit Nunaat isornartorsiorpaa. AG takuuk.
Kalaallit nivissat arnallu annilaarnartumik nakuuserfigineqarlutillu kinguaassiutitigut atornerlunneqartarput. Taamatut erseqqissaavoq Amnesty International 2009-mut ukiumoortumik nalunaarusiamini saqqummiunneqaqqammersumi. Inuit pisinnaatitaaffiinik suliniaqatigiiffiup innersuussutigaa FN-ip nakuusernermut immikkut nalunaaruteqartartuata ernumanartoqartimmagu Kalaallit Nunaanni nakuusernermik kinguaassiuutitigullu atornerluinermik pisartorpassuit.
- Amnesty Internationalip ukiut tamaasa nunarsuarmi tamarmi ajornartorsiutit misissortarpai, uagulli nammineq iliuuseqarnissatsinnut periarfissaqanngilagut. Naalakkersuisut kisimik aalajangertussaavaat isorinninnerit iliuuseqarfigissanerlugit pissutsillu pitsanngorsarlugit. Tamanna aamma atuuppoq namminersorlutik oqartussanut, Ole Hofflund, Amnesty Internationalip Danmarkimi immikkoortoqarfiani tusagassiornermut pisortaq oqarpoq, taassumalu naatsorsuutigaa neriuutigalugulu Namminersorlutik Oqartussat namminneq piumassutsiminnik ajornartorsiut annikillisarniassagaat.