KNR: Tusagassiuutit nakuunerusut
KNR-ip siulersuisuisa iluaraat suleqatigiissitanik Naalakkersuisut pilersitsisimammata tusagassiuutit nukittorsarneqarnissaannik siunertaqartunik.
KNR-ip siulersuisuisa pingasunngornermi juunip 2-anni ataatsimiinnerminni pisortat suliffeqarfiup iluani allanngortitseralutik suliaasa killiffiat misissorpaat. Suliat tamakku innuttaasunut kiffartuussinermi aallakaatitsiviup neqeroorutissaanik pitsaanerulersitsiniutaapput.
Sulisut aqutsisullu piginnaasamikkut piorsarneqarnissaat siunertaralugu pisortat suliniutigisaat siulersuisunit tapersersorneqarput, KNR-ip pisortai tusagassiuutinut nalunaarummi allapput.
Tusagassiuteqarneq pillugu suleqatigiissitaliaq qanittukkut pilersinneqartoq siulersuisut ataatsimiinneranni oqaluuserineqartut amma ilagaat. Nuna tamakkerlugu tusagassiuuteqarnikkut aaqqissuussinissamut siunnersuusiortussanik Naalakkersuisut suleqatigiissitaliorsimanerat KNR-imi siulersuisunit naammagisimaarparput.
- Taamatut suliniuteqartoqarnissaa pisariaqalivissimavoq, suliallu tamatuma inernissaa qilanaaraara. Qularnanngilluinnartorli tassaavoq tusagassiuutit sannginerusut maani nunatsinni pisariaqartinneqarput. Tassami tusagassiuutit maani nunami pissaanermik tigumminnittunut apeqqutinik akisarialinnik apeqquteqartartussaammata, tamakkuli eqqaassanngikkaanni tusagasiiuutit ataatsimut isigalugit sannginerulersinneqarnissaat aamma pisariaqarmat, siulersuisut siulittaasuat Peter Jensen oqarpoq.