Erfalasorput ukiunik 25-iliivoq
Post Greenlandip maajip aallaqqaataani erfalasutta nalliussinera frimærkimik nutaamik saqqummersitsilluni malunnartippaa.
1985-imi tallimanngornermi juunip 21-ianni nalunaaqutaq 8.00 kalaallit erfalasuat, eqqumiitsuliortumit Thue Christiansenimit sananeqarsimasoq, Nuummi Nuutoqqami siullermeersumik amuneqarpoq, inuit untritilikkaat Kalaallit Nunaata inuiattut ullorsiornerani siullermi erfalasulerfimmi katersuuttut.
Erfalasutta ukiunik 25-inngortorsiornera malunnartinniarlugu Post Greenland frimærkimik nutaamik saqqummersitsivoq, arfininngornermi maajip aallaqqaataani saqqummersinneqareersumik. Erfalasoq assigalugu frimærki nutaaq eqqumiitsuliortumit Thue Christiansenimit sananeqarsimavoq.
Ullumikkut erfalasoq Kalaallit Nunaanni nuannaarnermi aliasunnermilu pissusissamisoortumik atorneqartarpoq, ukiulli 25-it matuma siornatigut taamaassimanngilluinnarpoq. Erfalasoq pillugu oqallinneq 1974-imili aallartippoq, taamanikkut Atugagdliutit/Grønlandsposten erfalasumik unammisitsimmat, namminersornerullutillu oqartussat namminneq erfalasortaarusummata.
Sisamanngornermi februaarip 14-ianni 1985-imi Inatsisartut erfalasoq nutaaq taasissutigaat, suliassarlu mianernangaarmat inatsisartut qaqutigoortumik allakkatigut taasipput, inernissaali siumut ilisimaneqareerpoq: Siumumeersut Inuit Ataqatigiinneersullu 14-it Thue Christiansenip aappalaartumik/qaqortumik, sermip seqernullu qalipaataannik qalipaatilik, taavaat 11-illu (Atassut) nunat avannarliit allat erfalasuisut sanningasortalik taavaat, tassani Kalaalit Nunaannut qalipaatigitinneqarluni - qorsuk.
Oqallinneq 1985-imi upernaakkut ingerlaqqippoq, iluamillu sakkortusilluni paasineqarmat Thue Christiansenip erfalasuliaata Egå Roklubip erfalasuaraata assigerluinnaraa. Ukiuni tulliuttuni kalaallit angerlarsimaffiini qallunaat erfalasuat dannebrog amuneqartarpoq, ullumikkulli taamaallaat naalagaaffiup sinniisua, qallunaat suliffeqarfiit ileqqutoqqanillu attassisut ataasiakkaat dannebrogimik amusisarput.