Skip to main content

AG isumaqarpoq: Pinngitsaaliineq aaqqiissutissaanngilaq

Inuiaqatigiit aningaasarsiornikkut unamminartunik annertoorujussuarnik naapitassaqarmata qularutissaanngilaq. Landskarsi naammattunik aningaasaateqanngilaq. Inuiaqatigiit aningaasat atugassaat ikittuinnaasut sivisunerusumik pigineqarnissaanni misiligutitut Demokraatit politikikkut oqaaseqartartuat Niels Thomsen siunnersuuteqarpoq, utoqqalinersiaqalersarneq 65-inik ukioqarnermit 70-inik ukioqalernissamut sivitsorneqassasoq.

Siunnersuut tupaallaataanngitsumik taperserneqanngilaq, kinguaariit utoqqaat akornanni, eqqasuutissaqaratik maannakkut soraarninngorsimanerminnik atorluaasunit, imaluunniit isumaginninnermut naalakkersuisumit Maliina Abelsen-imit.

Nunamimi maani annertunerusumik utoqqalineq ajorpugut. Arnat agguaqatigiissillugu 70-it sinnilaarlugit inuusarput, angutit ukiunik tallimanik sivikinnerusumik inuusarlutik, ukiut 65-it angoqqartarlugit. Nunanut assersuuffiginiartakkatsinnut naleqqiullugu ukiut amerlavallaanngillat. Uatsinnit sivisunerusumik inuusarput, soraarninngortarlutilu 65-67-inik ukioqaleraangamik. Tassali nutaaliorniartup Niels Thomsen-ip anguniagaanit ukiukinnerullutik.

Siunnersuutip taamaattup pimoorullugu oqallisiginissaani taamaattumik piffissaq atorneqarsinnaavoq. Siunnersuullu taanna periaaseqarnissamik anguniagaqarfiugunarpoq, 67-inik ukioqalerluni soraarninngortarnissaq inernerussasoq ilimanarmat.

Inuit amerlanerit suliffimmi timimik artorsarfiusartumi sulisut utoqqalinerminni suli qaavatigut pillaatisiaqartinneqarnissaat naammaginanngitsoq AG isumaqarpoq. Ilimanaateqanngilarmi piffissami qaninnermi ima ilinniarluarsimatigisunik peqalissasugut, suliaqarfeqarunnaassalluni timimik artorsarfiusartunik aamma assigiiaaginnartunik suliaqarfiusunik.

Umiatsiaararsorlutik aalisartut erseqqissaatigiinnarsinnaavagut, nunatsinni tamarmi aatsitassarsiorfinni tattorleraallutik sulilersussatut Pallep suleqataasalu kissaatigisaat.

Taamatut oqarniarneq pimoorussinerunngilaq uppernaranilu. Inuit qinigaattut atugassaqarpoq Demokraatinut ilaasortat maannakkut aamma ilikkartariaqagaannik. Kingusinaarnermit ajunnginneruvoq. Inuit qinigaattut ilisimasat annertunerunngillat, innuttaasullu malersorneqarnissaat taakku suliassarinngilaat. Tassami innuttaasunut kiffartuussisuugamik.

Kisiannili ila. Siunissami inuiaqatigiit aaqqissuussaanissaat pillugu oqallinnermi Inatsisartut ilungersunartunik oqaluuserisassaqarput. Annikitsukujuilli pillugit tunngavissaqarpianngitsumik oqalunnermut taarsiullugu siuttuuneq tiguneqarli, inuit illersugasaannik pilersitsilluni, aaqqiissutissanik siunnersuuteqarnermi innuttaasut akuutillugit, ukioq 2030-mi inuiaqatigiit qanoq isikkoqassanersut pillugit.

Ataaserli erseqqippoq. Aalisartut nunamut niutillugit aatsitassarsiorfinnut inissinneqarnissaat iluaqutaanavianngilaq. Taamatut aaqqiinissaq iluatsinngitsoortussatut isikkoqareerpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER