Avannaani akileraarut qaffassaaq

Qaasuitsup Kommuniani kommunimut akileraarut procentimik ataatsimik qaffanneqassaaq 28 procentinngorluni, taamaasilluni nuna tamakkerlugu akileraarut kommuninullu ataatsimut akileraarut ilanngullugit 2011-mi akileraarutip procentia 45-unngussalluni.

Nunarsuarmi kommuneqarfiit annersaanni politikkikkut pissutsit paatsiveerupput akileraarutip qaffanneqarnissaata, arfininngormat ualikkut 15.15 missaani akuersissutigineqarnerata kingorna. Tamanna sioqqutilaarlugu Inuit Ataqatigiit Siumumik suleqateqarnertik kipitippaat, Siumullu Illulissani kommunalbestyrelsip ataatsimiittarfiani kisimiilerpoq.

Siumut ilaasortanit 21-init 10-nik ilaasortaatitaqartoq akileraarutip qaffannissaanut isumaqataanngilluinnarpoq, partiilli sisamat allat, Inuit Ataqatigiit, Demokraatit, Atassutip aamma Kattusseqatigiit Partiiata, katillugit 11-nik ilaasortallit, akileraarutip qaffannissaa akuersissutigaat.

Akileraarutit akitsuutillu amerlinagit

– Kommunimut akileraarutip qaffannissaa sooq Siumup akerleraa?

– Ukiakkut ataatsimiinnermi ilaqutariit pissakinnerpaat akitsuutinik annertuumik qaffaavigineqarput, siullerpaamik ikummatissamut, pingaartumillu kommunitsinni aalisartut piniartullu akileraarutinik akitsuutinilu nutaanik artukkeqqissinnaanngilagut, Siumup oqaaseqartartua Palle Jeremiassen sermitsiaq.gl-imut oqarpoq.

– Qaasuitsup Kommuniani kommunimut akleraarut procenti ataaseq 15,6 millioner koruuninik isertitsissutaasarpoq, Siumullu sipaaruteqarfissanik arlalinnik siunnersuuteqarsimavoq akileraarutip qaffannissaanut taartaalluarsinnaasunik, Palle Jeremiassen oqarpoq.

Siumup ilanngullugu siunnersuutigisimavaa kommunimi allaffissornermi procentip aappaata affaanik sipaaruteqartoqassasoq 12,8 millioner koruuninik nalilimmik, kiisalu sipaarutissanik arlalinnik, ilaatigut biilinik pisiortornerup unitsinneqarnissaa. Siumup sipaaruteqarnissamik siunnersuutai 17-18 millioner koruuninik naleqarput.

IA-p kommunimi gruppia ualeq manna tusagassiorfinnut nalunaaruteqarpoq, kommunimi politikerinit tallimansit Peter Olsenimut, Edvard I. Kristiansenimit, Hans Aronsenimit, Isak Hammondimit aamma Bendt B. Kristiansenimit atsiorneqarsimasumik, tassuunakkut Siumumik suleqateqarnerup kipitinneqarnera nalunaarutigineqarluni, tamannalu peqatigalugu IA-p apeqquserlugu kommunip erloqinartumik aningaasaqarniarnera Siumup aqussinnaaneraa.

Matut tamarmik ammapput

– Maanna qanoq pisoqassava?

– Kommunalbestyrelsi tullianik ataatsimiissaaq 2011-p aallartinnerani, tamassumalu tungaanut Siumut nutaanik suleqatissarsiussaaq Inuit Ataqatigiit taartissaannik, Palle Jeremiassen sermitsiaq.gl-imut oqarpoq.

– Partii sorliusinnaqava?

– Matut tamarmik ammapput, Palle Jeremiassen oqarpoq.

Kommunimi politikkimi borgmesteri ukiunut sisamanut qinigaaffimmut tamarmut toqqarneqartarpoq, Siumumeersorlu Jess Svane taamaattumik suleqatigiikkunnaarnikkut ulorianartorsiortinneqanngilaq, Qaasuitsulli Kommuniani kommunalbestyrelsimi suli amerlanerussuteqartunit illua'tungeqassaguni iliuuseqarsinnaanera annertuumik killilersimaartinneqassaaq.