Naligiissitaanerup ulluanik pilluaritsi
– Ukiorli naallugu naligiissitaaneq oqaluuseri9sassavarput, Maliina Abelsen aamma Poul Hansen oqarput.
Ilulissanut kangerluannut isikkivilerlutik naligiissitaanermut naalakkersuisoq Maliina Abelsen Naligiissitaanermullu Ataatsimiititaliap siulittaasua Poul Hansen imminnut Kalaallillu Nunaat tamaat pilluaqquvaat, nunap oqaluttuarisaanerani naligiissitaanerup ulluani siullermi.
Taakkua marluullutik Ilulissaniipput kommuneqarfiit kattuffiata Kanukokap ataatsimeersuarneranut atatillugu, inimilu ataatsimeersuarfimmi takoreerpaat nuna tamakkerlugu kommunimilu politikererpassuit akornanni arnat angutillu amerlassusaat assigiinngissuteqareersoq.
– Naligiissitaanerli sorpassuuvoq, taamaattumillu innuttaasut naligiissitaanermik isiginninnerannik oqallinnermik aallartitsiniarpugut, Maliina Abelsen aamma Poul Hansen sermitsiaq.ag-mut oqarput.
Nuummi Kalaallit Nunaanni Gay Pride-mi siullerpaami inuit peqataasut 1.000-t takutippaat naligiissitaaneq tassaaginnaanngitsoq angutit arnallu akornanni naligiissitaanissaq, aammattaarli inuit tamarmik akornanni naligiissitaanissaq pineqartoq.
Maliina Abelsenillu sulisartoqarnermi naligiissitaaneq oqaloqatigiissutigerusuppaa: – Ulluunerani paaqqinnittarfiutitsinni sulisut amerlanerpaartaat arnaapput annertuumik suliaqartut, meeqqalli angutit maligassiusussatut amigaatigaat.
Poul Hansenillu naligiissitaanerup ulluata annertusiartornissaa kissaatigaa: – Maajip 20-iata naligiissitaanermut ulloritinneqarnissaa Inatsisartut aatsaat sapaatit akunnerisa marlussuit matuma siornatigut akuersissutigaat ukioq mannalu ulloq annertunngitsumik malunnartipparput, siunertaralugu aappaagu amerlanerpassuarnik suliniuteqarnikkut malunnartinneqarnissaa.
Juliane Henningsenip, Inuit Ataqatigiit, tikkuarsimavaa Kalaallit Nunaanni naligiissitaanerup ulloqarnissaanik pisariaqartitsisoqartoq, Naligiissitaanermullu Ataatsimiititaliap ulloq maajip 20-at tikkuarsimavaa naligiissitaanerup ulluatut naleqqulluartutut, tassa ataatsimiititaliaq ulloq taanna 1998-imi maajip 20-ianni inatsisikkut pilersinneqarsimammat.
Naligiissitaanerup ulluata kingunerisaanik Maliina Abelsenip atorfini allanngortippaa isumaginninnermut naligiissitaanermullu naalakkersuisumut, erseqqissarniarlugu naligiissitaaneq politikkikkut pingaartinneqarluartoq.