Skip to main content

Tuusi: Unnuk nalliuttorsiornartoq

Dronningip nerersuartitsinerani Inatsisartut siulittaasuaq Josef Motzfeldt Kunngissap nerrivianeeqataavoq.

– Unnuk pingaartorsiornartuullunilu assigiinngitsorpassuarnik aliikkusersuisoqarpoq. Ukiut qulikkaarlugit erinniat taalliallu eqqumiitsuliortunit saqqummiunneqartarlutik. Prins Henriup viinniliai pitsaviupput, aammami nerisassat ilaatigut peqquit nersussuaaqqallu neqqarinneri.

Josef Motzfeldt naalagaaffiup Kalaallit Nunaanni sinniisaa Søren Had Møller ilagalugu Droning Margrethep tallimanngormat 70-iliinissaa malunnartinniarlugu marlunngormat unnukkut Christiansborg Slotimi inuuissiortoornermi qaaqqusanut 400-ngajannut akuusimasoq oqaluttuarpoq.

Josef Motzfeldt nalliuttorsiornermi nerriviit ataqinarnersaasa ilaannut inissinneqarsimavoq, tassa illersornissaqarfiup qullersaa Kunngissarlu Frederik, Kalaallit Nunaannut attuumassuteqarluinnartut nerriveqatigalugit, Josef Motzfeldtillu nerrivik taanna nuannerluinnarsimanerarpaa.

– Kunngissaq najuukkaangat nunarput eqqartorneqartarpoq. Ilaatigut immap sikuusarunnaarnera soqutiginnilliuinnarluni tusarusuppaa, tamatumalu Avannaani piniartunut sunniutai aamma oqaluuseraagut, Josef Motzfeldt aqaguinnartorli inatsisartut ataatsimiinnerannut peqataajartorluni Nuuliarluni aallarsimasoq unnersiorpoq.

Dronningi inuuissiornerani Inatsisartut Naalakkersuisullu ataatsimoorlutik eqqumiitsuliortup Niels Motzfeldtip qalipagaanik tunissuteqarfigaat. Eqqumiitsuliamik »Arnap Sullivia«-nik taaguutilimmik.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER