Inuussutissarsiuteqartut Air Greenland kamaatigaat

- Air Greenlandimik tatiginninneq ajornakusoorpoq, maannakkummi Islandimut angalanissaq suliluunniit piviusunngornani taamaatinneqarpoq, Qaqortumi Erhvervsforumimi siulittaasoq Jim Riis oqarpoq, Air Greenlandip Narsarssuarmiit Keflavikimut aqqutip taamaatinnerat nalunaarutigimmagu, sulilunniit aallartinngitsoq.

- Sapaatip akunnerani kingullemri Angallannermut ataatsimiititaliarsuup siulittaasua eqqartueqatigaarput, nunatta kujataanni Atlantikoq qulaallugu timmisartornerup pingassusia pillugu, tamannali Air Greenlandimit kissaatigineqanngilaq, periarfissarmi taanna misilissalluguluunniit kissaatiginngilaa. Air Greenland tatigeqatigiinnissamik eqqartuisarpoq, tatigeqatigiinnerli illuatungeriinnit pisariaqarpoq, kingumullu Air Greenlandimiit nunatta kujataani inuussutisarsiornikkut takornariaqarnikkullu periarfissat isiginngitsuusaarneqarput, Jim Riis oqaluttuarpoq.

Air Greenland ataasinngormat nalunaarpoq, maajimi, juunimi septembarimilu inniminniisimasut ikippallaarnerat peqqutigalugu Narsarsuarmiit Keflavikimut angalanissat taamaatiinnarneqartoq.

- Nioqutissap suliluunniit tuniniarneqanngitsup unitsinnera eqqumiippoq. Air Greenlandimiit tuniniaaneq isiginiarneqartariaqaqqarsimassagaluarpoq. Narsarsuarmiit inniminniiniaraanni nittartakkami taamaattumik ersittoqangnilaq, tassani Keflavikkikkoornissaq inersuunneqarluni, akerlianiilli Air Greenlandip tuniniaaneq Nuummut Kangerlussuarmullu tunngavoq. Taassuma saniatigut Keflavikimiiy aqqutissat allat innersuunneqanngillat.

- Imaanngilaq timmisartoq untritilikkaanik ilaasoqarsinnasoq ulikkaarneqartussaq - inniminniinerillu takkussuussimasinnaalluarput. Inuussutissarsiuteqartugut apriilimi septembarimi angalanissat inniminnerneq ajorpavut. Isumaqarpugut Air Greenlandip aqqut taanna piumassuseqarfiginagu pilersissimagaat. Piumasimasuugunikkummi inuussutissarsiuteqartunut innuttaasunullu tuniniaallutik ussassaarisimassagaluarput, Narsami Erhvervsforumimiit Ib Laursen oqarpoq.

- Air Greenlandip nunatta kujataani kiffartuussinera ajorsiartuinnarpoq. Tamannalu inuussutissarsiuteqartunut takornarialerisunullu ajornartorsiortitsivoq, Air Greenlandimiit nalunaarutit naatsorsuutigineqarsinnaanngimmata, Nanortalimmi Erhvervsforumip siulittaasua Uvdloriaq Petersen oqarpoq.