Oqaloqatigiinnissamik neqeroorut sunniuteqarluarpoq

Nuummi isumaginninnikkut siunnersuisartut MISI-meersut (PPR) ukiuni arfinilinni Nuummi atuarfinnik suleqateqarneq iluartilluartutut nalilerpaat.

Atuartunut 6-10-klassiniittunut oqaloqateqarnissamik neqeroorut pinaveersaartitsinermik kinguneqarpoq. Assi: Leiff Josefsen.

Isumaginninnikkut siunnersortit atuarfinnik suleqateqarnerminni sapaatip akunneranut atuartunik oqaloqateqarnissamik innersuunneqarsimasunik oqaloqatigiinnissamik nerooruteqartarput, sermersooq.gl allappoq.

Meeqqanik 6. - 10- klassinut siusinaartumik iliuuseqartarneq pinaveersaartitsinermik sunniuteqarsimavoq, ajornartorsiutillu ajorsivinnginneranni atuartunik oqaloqateqarnissamut innersuunneqartunut iluaqutaalluni.

- Isumaginninnermi siunersortinik oqaloqateqartarnerit kinguneraat ilinniartut ammanerulersimanerat, oqaloqatigiinnerit ulluinnarnik atugaannik oqilisaataasarmata, piffissami sunik ajornartorsiuteqarnerlutik oqaasertalersuinissaminnut ajornartorsiorneranni oqaloqatigiinnerit pisarmata. Allaat atuartut ilaat nammineerlutik saaffiginnillutik oqaloqateqarumasarput. Ilinniartitsisut angajoqqaallu aamma taama aaqqissuussisimanermik iluarinnillutik oqaaseqartarput, ulluinnarni meeqqamik pissusilersornerisa pitsanngoriarneranik kinguneqartarmata, ilinniarumanerulerlutik, inersimasunik atuaqatiminnilluunniit attaveqarnerulerlutik, taama oqaluttuarput isumaginninnikkut siunnersortit suleqatigiit Sara Abelsen, Inge Larsen aamma Paniaraq Rosing Søltoft.

Atuartut ilinniartitsisunit angajoqqaanillu oqaloqateqarnissamik innersuunneqartarput, soorlu aamma nammineerlutik siunnersortimut saaffiginnissinnaallutik, inuunerminni ajornartorsiutinik nalaataqarnerminni siunnersorneqarusullutik, soorlu angajoqqaami avinnerisigut, angerlarsimaffimmi imigassartornermut atatillugu imaluunniit asanninnermut tunngatillugu allanilluunniit ajornartorsiuteqarunik meeqqamut inuusuttuaqqamullu qaangeruminaatsunik.

Nuuk atuarfiit tallimat tamarmik sapaatip akunnikkaartumik isumaginninnikkut siunnersortimit pulaarneqartarput, meeqqat ajornartorsiuteqarsimappata suleriaqqinnissamut nalornigunik ilinniartitsisut siunnersortimik ikiorteqarsinnaallutik.

Isumaginninnikkut siunnersorteqatigiit takorluugaraat siunissami neqeroorut taamaattoq aamma Paamiuni, Illoqqortoormiuni aamma Tasiilami atorneqalersinnaasoq.

Powered by Labrador CMS