Qeqqata Kommunia siullersaavoq
Eletroniskimik paasissutissiisarnermik atuinermi Sermersooq kommunini siullersaanngilaq, Qeqqata Kommunia erseqqissaavoq.
Kommuneqarfik Sermersooq kommunini siullersaanngilaq elektroniskimik paasissutissiinermik atuisalernermi. Taamatut tusagassiorfinnut nalunaarutikkut erseqqissaavoq Qeqqata Kommunianeersoq Mads Pihl, Kommuneqarfik Sermersooq ippassaq elektroniskimik allagarsiiviup nutaap ilisaritinneqarneranut atatillugu tamatuminnga atuilersuni siullersaalluni oqarnerata kingorna.
– Taamanikkut Sisimiut Kommune 2008-mi paasissutissiisarfimmik suliniut siulleq aallartippaa, Qeqqata Kommuniatalu 2009-mi tamanna piviusunngortippaa Sisimiuni, Kangerlussuarmi, Itillimi Sarfannguanilu arfineq-pingasunik paasissutissiinermut allagarsiivilernermigut, Mads Pihl allappoq.
Tamatuma saniatigut Sisimiuni sumiiffinni toqqakkani paasissutissiinermut allagarsiivilertitsoqarpoq, taamaasilluni illoqarfinni tamani sisamani nunaqarfinnilu takornariat elektroniskiusumik paasissutissanik takunnissinnaalerlutik.
Suliniut Ini suleqatigalugu ingerlanneqarsimavoq, taassuma ilaatigut nunaqarfinni attartortut elektroniskiusumik kiffartuuttalerusummagit.
Maanna suliniut annertusineqassaaq Qeqqanilu Inuussutissarsiornermut Siunnersuisoqatigiit nunap immikkoortuani tamarmi allagarsiivinnik suli 12-13-inik pilersitsisoqarnissaa sulissutigaa, taamaasilluni kommunimi illoqarfiit nunaqarfiillu tamarmik innuttaasunik sullissinermut takornarianillu paasissutissiinermut allagarsiiveqalissallutik.
Tamanna pissaaq kommuni suleqatigalugu.
– Tamatuma saniatigut nunap immikkoortuata paasissutissiisarfii Sermersuumit allaanerupput, tassa tassani InfoBoards-ini paasisaqarfimmit ataatsimit paasissutissat kisimik takuneqarsinnaammatya taamaattumillu attaveqaqatigiittoqarani taamaallaalli paasissutissanik pisoqarsinnaalluni, paasissutissiiffiit kommunimik, Ini-mik takornraiaqarnermillu ingerlatsivinnik nettikkut attaveqaqatigiittarnissamut naatsorsuussaasut, Mads Pihl allappoq.