Erngup nukinganik nukiliorfik ullumi atoqqaartinneqassaaq
Sisimiuni innuttaasut nunatsinni erngup nukinganik nukiliorfiit arnersaasa aappaanit nukimmik minguitsumik uuliamik atuinermik milliuunilikkaanik sipaarfiusumik pilersorneqalissapput.
Ullaap tungaa nalunaaqutaq 10.30 Sisimiuni erngup nukinga atorlugu nukiliorfik pisortatigoortumik atoqqaarfissiorneqassaaq, ilaatigut Inatsisartunit, Qeqqata Kommunianit, Nukissiorfinnit, Pihl & Søn-imit Istakimit tusagassiortunillu peqataaffigineqartumik.
Nukissiornermut pisortaq Svend Hardenberg erngup nukinga atorlugu nukiliorfiup 500 million kronit atorlugit sananeqarsimasup atoqqaartinneqarneranut pingaarnertut oqalugiartuussaaq. Taamaalilluni siunissami minguitsumik nukissiorfeqalissaaq aningaasanillu sipaartoqarluni. Erngup nukinganik nukiliorfik atulerpat Sisimiuni uuliamik tankeqarfik sillimmatitut atulissaaq. 2008-mi innaallagissiorfiup katillugu uulia 6,5 million literit missaat atorsimavaa, taannalu Tasersuarmit erngup nukinganik nukiliorfimmit taarserneqassaaq. Ullumikkut uuliap akianut naleqqiullugu tamanna ukiumut 28 million kronit missaannik sipaarfiussaaq.
Erngup nukinganik nukiliorfik nammineq - Utoqqarmiut Kangerluarsunnguani erngup nukinganik nukiliorfiup tulliatut angitigisoq - Kangerluarsuup Ungalliup qinnguani Sisimiut avannaani 27 kilometerimik ungasitsigisumi tatsip Tasersuup eqqaani sananeqarpoq. Tatsimiit nukiliorfiup tungaanut nunap iluatigut sulluliortoqarsimavoq 5 kilometeringajannik takitigisumik, tassaniippullu sarfaliuutit turbinit marluk 7.5 megawattinik sarfaliorsinnaasut. Nukiliorfimmiit Sisimiuni inoqutigiit tamarmik ukiorpassuarni aggersuni innaallagissamik pilersorneqassapput.