Højskolip avammmut nittarsaasua

Knud Rasmussenip Højskolia atuartuilu Juliep uummammiorai. Maanna højskolimut illersuisunngorpoq. Illersuisoq kingulleq tassaasimavoq dronning Ingrid.

Julie Berthelsenip Knud Rasmussenip Højskoliani atuartut naapippai.

Julie Berthelsenip Sisimiut aamma illersuisuuffigisani Knud Rasmussenillu Højskolia, tikeraaqqammerpai. Illersuisuuffik (protektorat) dronning Ingridimit, højskolip illersuisuanit kingullermit, "kingornussimavaa". Julie højskolip - immaqalu aamma Arnat Ilinniarfiata - avammut nittarsaasorissavaa, ullunili kingullerni højskolimi atuartut tassaneeqartigisimavai.

- Højskolimi atuartut suleqatigalugit migisaq annertoorujussuusimavoq, taamaattumik maanna ilinniarfik ilinniartuilu ilisimalerpakka, Julie højskolimik tamatigut iluarinnittuulluarsimasoq, oqarpoq.

Knud Rasmussenip Højskoliata Julie illersuisutut siullerpaamik avammut nittarsaasoraa. Soorlu tallimanngormat ualikkut tusagassiortunik katersortitsinermi.

- Aammattaarli aningaasaateqarfinnut assigiinngitsunut atatilugu suliniuteqarpunga, siullerpaamik ilinniarfiup ambassadørii aqqutigalugit, taanna oqarpoq.

Illersuisuuffik suli nutaarluinnaavoq. Aatsaat siorna ukiakkut Julie Berthelsen illersuisutut toqqarneqarpoq. Sapaatip akunnerani kingullermi siullermeerluni højskolimut tikeraarpoq. Juliep naatsorsuutigaa ukiumut ataasiarluni højskolimut tikeraartassalluni, minnerunngitsumik højskoli 2012-imi ukiunik 50-inngortorsiorluni nalliuttorsiorpat.

Julie kisimi Knud Rasmussenip Højskolianik avammut nittarsaasuunngilaq. Ilinniarfiup ambassadørerpassuisa, ilaatigut Michael Binzerip, Air Greenlandip pisortaata, Uffe Ellemann-Jensen aamma Flemming Knudsenip, Royal Greenlandimi pisortap, aningaasaateqarfinnut qinnuteqarnernut atatillugu højskoli tapersersorlugu oqaaseqartarput.

- Ullut pingasut qaangiuppata Arnat Ulluat nalliussineqassaaq. Tamanna eqqarsalersiitsiva?

- Naamik, taamaallaat isumaqarpunga ullut tamarmik naligiissineqarnissamik sorsuutiginninnerusut, Julie qungujulluni oqarpoq, aammattaarli isumaqarpunga pingaaruteqartoq ulloqarnissarput tamatta eqqarsaatigalugu suut angusimanerlugit suullu suli amigaatiginerlugit. Assersuutigalugu assigiissumik akissarsiaqartinneqarnissaq.

Jakob Møller Lyberth tapersiivoq:

- Knud Rasmussenip Højskoliata naligiissitaaneq tamatigut pingaartitaraa. Tamannarpiaq dronning Ingridip pingaartitaasa ilagisimavaat.

Powered by Labrador CMS