Aningaaserivik siuariartornissamik qaffakkiartornissamillu neriorsuivoq

Savalimmiormiut pigisaat Føroyar Banki, Sparbankip Kalaallit Nunaanni immikkoortoqarfianik pisiarinneqqammersoq, siuariartupiloorpoq.

Føroya Banki 2009-mi siuariarsimavoq 26 pct-nillu aningaasaateqarnerulernikuugami suli siuariartornissaminut periarfissaqarluarpoq, fyens.dk allappoq.

– Føroya Bankimi ingerlatatta pingaarnersaasigut siuariartortuarpugut, mianersortumilli ingerlatseriaaseqarlutalu aningaasaateqarnermik sukangasuumik aqutsivugut, allaffissorluni aqutsinermi qullersaq Janus Petersen naatsorsuutit pillugit nalunaaruteqarnermini allappoq.

Aningaaserivik ukiormanna aamma Danmarkimi aningaaseriveqarnermi toqqavimminik qajannaallisaaqqinniarpoq ilaatigut Sparbankip Danmarkimi immikkoortuinik Kalaallit Nunaannilu ingerlataanik pisisarluni.

Føroya Bankip immikkoortoqarfimi katillugi 12-ini ingerlatat pisiarisimavai, Finanstlsynimit akuerineqarluni.

– Tamakku pisiarinerisigut Savalimmiut avataannissaaq toqqavissaqarlualerlutalu imminut akilersinnaasumik ingerlatsisinnaalerpugut, Janus Petersen allappoq.

Føroya Bankip 2010 ikaarsaariarfiunerarpaa.

– Ukiumi ikaarsariarfiusumi nunani pingasuni taakkunani (Danmark, Kalaallit Nunaat Savalimmiullu, aaq.) aningaasaliisarlutalu toqqavissatsinnik iluarsaassissaagut, Savalimmiunilu aningaaserivimmik ingerlatsineq Bankpakke 1-imullu tunngatillugit akiligassat aningaasartuutigissallutigit, aningaaserivik ilisimatitsivoq.

Savalimmiuni nalikillilerisarneq qaffasinnerpaaffissaminut killereersimavoq, aningaaseriviulli Danmarkimimi Kalaallit Nunaannilu 'annaasaqalaarnissaq' ilimanarsinnaanerarpaa.

Aningaaserivik 2009-mi erniatigut akiliutitigullu 455 mio. kr-inik isertitaqarsimavoq ukiumi siuliani 381 mio. kr-iusimasunik aningaasallu nalinginut iluarsiissutit 24 mio. kr-iusimallutik ukiumi siuliani minus 73 mio. kr-iusimagaluarlutik.

Taarsigassarsiarititanilli nalikillilerineq 128 mio. kr-inut qaffassimavoq 2008-mi 105 mio. kr-iusimagaluarluni.

Powered by Labrador CMS