Tarnimikkut nappaatillippassuit ikiarornartumik atuisuupput
Tarnimikkut nappaateqarlutik unittartut affaata missaat arlaatigut atornerluinermik ajornartorsiuteqartuusarput. Taakkunanilu ikiaroornartumik ajornartorsiuteqartut amerlanersaallutik. Taama oqarpoq nuummi Dronning Ingridip napparsimavissuata, tarnimikkut nappaatillit immikkoortortaqarfiani nakorsaaneq Jonna Jakobsen Pleisner.
Hashimik atornerluineq peqqinnissamut kingunipilutsitserujussuarsinnaavoq. Kingunipiluit ilagisinnaavaat tarnikkut perulunneq (hashpsykose), tarnimikkut nappaatillit immikkoortortaqarfiannut inissiinermik kinguneqarsinnaasumik.
ALLAASERISAQ ATUARUK: Ikiaroornartoq ullaakkorsiutitut
– Hashpsykosemi ersiutaasartut tassaagajupput piviusuunngitsumik takusuuserineq tusaasuusinerluunniit. Naliginnaaneruvoq tusaasuusineq, allaasinnaappulli aamma, soorlu naamasuusineq, mamassutsimik ussiisorinninneq (smagshallucinationer) kiisalu attuuaneqarsorineq, nakorsaaneq Jonna Jakobsen Pleisner nassuiaavoq.
– Piviusorsiunngitsumik isummersornarsisinnaavoq, inummut nammineq tunngasunut imaluunniit avatangiisit tungaatigut. Piviusorsiorpalaanngitsumik naliliisalernarsisinnaavoq, misiginarsisinnaalluni eqqarsaatit allanit takuneqarsinnaasut, imaluunniit qinngornernit sunnerteqqasorinarsinaalluni, oqarpoq nakorsaaneq Jonna Jakobsen Pleisner.
ALLAASERISAQ ATUARUK: Hash-eerniarnermik inuussutilik
Tarnikkut perulunneq hashimik aallaavilik qaangerneqarsinnaavoq ikiaroornartumik atuiunnaaraanni. Peqqisseqqittoqarsinnaavoq.
– Aap, hashpsykoserneq qaangerneqarsinnaavoq hashimik atuineq unitsillugu kiisalu nakorsaatinik katsorsartinnikkut. Taassuma saniatigut oqaloqatiginninnikkut katsorsartilluni, ajornartorsiutinik eqqartuinikkut taamaalilluni inuttut ineriartoqqilerluni, nakorsaaneq Jonna Jakobsen Pleisner oqarpoq.
ALLAASERISAQ ATUARUK: Ikiaroornartumik akiuiniarneq ilungersunartoq
FAKTA:
Hashi kræfteqalersitsisarpoq
Hashimik marihuanamillu pujortarneq puannut ajoqusiisarpoq. Cigarettimik pujortarnermiik hashimik pujortarneq puakkut kræfteqalernissamut ulorianassusaa annertunerujussuuvoq. Marihuanap pujua cigarettininngaanniik kræfteqalernartunik kulbrintinik 50 -70 procentinik annertunerusumik akoqarneruvoq, jointi ataaseq pujortaraanni assigiinnarpaa cigarettit tallimat pujortaraanni.
Tusarfik: http://www.nejtilstoffer.dk/index.php/page.278/De%20skadelige%20virkninger%20ved%20hash.html