Oqaatsit pillugit ataatsimeersuarnermi rappertartut

Rappertartut Don Maliko aamma Peand-el kultureqarnermut naalakkersuisoq peqatigalugu ataasinngomat Iqalunnut aallarput nunatsinni oqaatisigut misilittakkat Nunavumi saqqummiukkiartorlugit.

Don Maliko KNR Music Awards 2008 ingerlanneqarnerani, ukioq taanna nutaatut nersorniarneqarami. Assi: Leiff Josefsen

Marlunngornermiit tallimanngornermut Nunavumi naalakkersuisut ataatsimeersuartitsissapput qulequtaqartumik 'Nunavut Language Summit' eqqartorneqartussat ilaat tassaalluni: “Oqaatsivut ataatsimoorfigaavut.” Nunavumi oqaatisit pillugit naalakkersuisoq, Louis Tapardjuk, ataatsimeersuarnermi qaaqqusisuuvoq, taama Kultureqarnermut, Ilinniartitaanermut, Ilisimatusarnermut ilageeqarnermullu naalakkersuisoqarfik KIIIN nalunaaruteqarpoq.

Nunavumi naalakkersuisut Naalakkersuisunut ilaasortaq Mimi Karlsen, Oqaasileriffik, Inerisaavik/Ilinniusiorfik kiisalu rappertartut marluk , Don Maliko aamma Peand-el qaaqquaat, oqaatsitigut inissisimanermut atatillugu kalaallit misilittagaannik ilinniartitsiartorlutik.

Ataatsimeersuarnermi eqqartorneqassapput Inuit oqaasii, tuluttut franskisullu pillugit ajornartorsiutit assiginngitsut.

Inuit najugaannit allanit aamma peqataasoqassaaq. Oqaatsinik ilisimasallit soqutigisaqaqatigiiffiillu ikinnerussuteqartut oqaasii eqqartussavaat, Nunap Inoqqaavi pillugit FN-ip aalajangersagai aallaavigalugit.

Pingaarnerli tassaavoq innuttaasut pisinnaatitaaffimminnik paasinninnissaat, taamaalillutik qanoq ingerlanissamik aalajangeeqataallutik oqaatsillu nutarternissaannut peqataallutik.

Inuit oqaasiisa illersornissaannik siuarsarnissaanillu immikkoortumik nutaamik ataatsimeersuarneq pilersitsissaaq, KIIIN ilimasaarivoq.

Powered by Labrador CMS