Haitimut katersuiniaalluni tusarnaartitsineq inuppassualik
Nutartigaq: Tallimanngomat unnukkut Nuummi Katuami Haitimut katersuiniarluni tusarnaartitsinermi tusarnaariat 900-t missaanniipput. Naatsorsuigallarnerit malillugit isertitat 200.000 koruunit missaanniipput.
Ove Heilmann nuannaaqaaq, arfininngormat ualikkut oqaluttuarami ikiuiniarluni tusarnaartitsineq 200.000 koruuninik isertitsivigineqartoq.
– Suut tamarmik kisinneqarsimanngillat, naatsorsuutigaarali ikinnerpaamik aningaasat taakkua angusimassallutigit, taamaalillungalu angorusutara anguara, Ove Heilmann oqarpoq.
Taanna tusarnaartitsinissamik isumassarsivoq januaarip 12-ianni nunap sajunnerata kingorna, nipilersoqatigiillu arfinillit peqataajumasimapput. Taakkua tassaapput Qarsoq, Aalut, Zikaza, Nina K. Jørgensen, Kalak aamma Naneruaq, tusarnaariallu nuannisartilluaqaat.
ASSIT ISIGINNAAKKIT: Haitimut katersuiniarluni tusarnaartitsineq
Tusarnaartitsinermi aningaasartuutit ilarparujussui Katuap aningaasaligarai, matulerisuniit, bartenderinut atisaajartarfimmiittunullu.
Tusarnaartisinermit isertitat ataasinngorpat februaarip 15-ianni Katuami nal. 14 Kalaallit Røde Korsiannut tunniunneqassapput, Ove Heilmann oqarpoq.
Kalaallit Røde Korsiata nittartagaa malillugu ulloq manna tikillugu 721.000 koruunit katersorneqarsimapput.