Uranimik piiaanermut 12,5 milliarder kronit atorniarpaat
Greenland Minerals and Energyp qulariunnaarpaa Narsami iluamaarfiusorujussuarmik piiaaffeqalersinnaanera.
Narsap timaani Ilimmaasami ukiuni pingasuni misissuinerit inerneri nalunaarusiaagallartumi katersorneqarput. Aatsitassanik qaqutigoortunik 43.729 tonsit sinnerlugit piiaavigineqarsinnaaneranik periarfissatsialammik misissuinerit erseqqissumik takutitsipput, australiamiut ingerlatseqatigiiffiat Greenland Minerals and Energy allappoq.
Piiaavik sivikinnerpaamik ukiuni 23-ni piiaavigineqarsinnaasoq naatsorsuutigineqarpoq.
Kuannersuarni misissueqqaarnerup inerneri, suliffeqarfiup Greenland Minerals and Energyp nammineerluni piffinni misissuinerni kiisalu misissueqqissaartartut suliffeqarfiiniit pissarsiarisimasai pitsaasorujussuupput neriulluarnarlutik, ingerlatseqatigiiffik allappoq.
– Nalunaarusiaagallartup ersarissumik inerniliineq takutippaa, piiaavigineqarsinnaasoq eqqaalu nunarsuarmi nunarsuup sananeqaataani aatsitaasat qaqutigoortunik peqassutsikkut annertunerpaat ilagigaat. Saniatigulli aamma soorlu naluneqanngereertoq uranimik peqarluni.
Ingerlatseqatigiffiup erseqqissarpaa aatsitassat qaqutigoortut, mobiltelefoniliornermi atorneqartartut, uranitaqaratik piiarneqarsinnaanngitsut. Apeqqut Inatsisartut ukiaru sammeqqittussaavaat.
– Kalaallit Nunaanni oqartussat akuersissappata kiisalu inaarutaasumik akilersinnaassutsimik misissuinerit allanngorpallaassanngippata, suliffeqarfik piareersimavoq ukiut tulleriit tallimat ingerlaneranni piiaavissamik pilersitsinissamut aningaasaliiniarluni aningaasanngorlugit annertussusilimmik 12,5 milliard koruunit.
Ingerlatseqatigiiffiullu makku sananiarpai: Talittarfik itisuumik sissalik pilersinneqarnissaa, aqqusernit qaqqatigut ingerlaartut 13 kilometerisut takitigisut, suliareqqiiviit marluk, sulisut najugaqarfii, toqqorsiviit kiisalu piiaavik soorunami, suliffeqarfinnik assigiinngitsunik kommuneqarfimmi malitsigisaanik pilersitsisussat.
– Misissueqqaarnerit inerneri ima tutsuiginartigipput allaat suliffeqarfik piumassuseqarpoq atortorissaarutinik sanaartornissaminik 2013 aallarnerfigalugu piianerlu 2015-imi aallartillugu, ingerlatseqatigiiffiup pisortaa Roderick Mcilleree nalunaarusiap tigunerani oqarpoq.
Greenland Minerals and Energymit aallartitat marsip aallartisimalernerani Nuummut tikeraassapput, nalunaarusiaq politikerinut tusagassiorfinnullu sukumiinerusumik nassuiariartorlugu.
Ilimmaasami pilersaarut pillugu ingerlatseqatigiiffiup nammineq saqqummiussaa talerpiatungaani aasinnaavat.