Meeqqat ornittagassaannut katersuiniarneq

Nuna tamakkerlugu sulinaqatigiiffik Nanubørn februaarip 26-anni Nuummi isiginnaartitsinissaarsuaq aqqutigalugu nunatsinni katersuiniassaaq. Katersuiniarneq toqqaannartumk KNR-TV-kut aallakaatinneqassaaq.

Basim, X-factor 2008-mit ilisimaneqartoq, februaarip 26-ani isiginnaartitsinissaarsuarmi peqataassaaq. Assi: Marianne Langvardt.

Nuna tamakkerlugu suliniaqatigiiffik Nanubørn februaarip 26-ani nuna tamakkerlugu katersuiniarnissamik suliniuteqarpoq, nunatsinni tamarmi Nanubørn ornittakkanik pilersitsiniarluni aningaasanik katersuiniarnermik siunertaqartumik.

Katersuiniarneq toqqaannartumik KNR-TV-kut aallakaatinneqassaaq, tassani eqqumiitsuliortut arlaqartut, atisanik takutitsisartut meeqqallu aliikkusersuissallutik.

- Nanubørn aaqqissuussami annertuumik sulisimavoq. Isiginnaagassiamik aatsaat taama annertutigisumik suliniaqatigiiffik pilersitsisuuvoq, naatsorsuutigilluinnarparpullu kalaallit innuttaasut katersuiniarermi tapersersuissasut, Meeqqani Inuunerittuni siulittaasoq Line Frederiksen oqarpoq.

Nanubørn, MIBB, ICYC aamma Red Barnet suleqatigiiffimmik pilersitsivoq, sulininiaqatigiiffiit sulimiummik ataqatigiissaarnissaannut siunissamilu suliniutinut sulieqatigiittarnissamik imaqartumik.

Nanubørn illoqarfinni nunaqarfinnilu tamani ornittakkanik pilersitsinissamik suliniuteqarpoq, MIBB-ili pinaveersaartitsinermik pilersaarusiornermillu suliniuteqarluni.

Suliniaqatigiiffiilli anguniagaq ataaseq katersuuffigaat, tassalu Kalaallit Nunaanni meeqqat atugaasa pitsanngorsarnissaat. Suleqatigiinnikkut qulakkeerniarneqarpoq suliniaqatigiiffiit pikkoriffiisa atorluarnissaat, isumaqatigiissuteqarsimappullu takussaasumik akunnerminni suliaminnik saqqumisumik tapersersuisarnissaq.

- Suliamut tapersersuinerup saniatigut MIBB suliniaqatigiiffiillu allat Nanubørn suliassanik assigiinngitsunik ikiorniarpaat. Isiginnaartisinerissaarsuarmi ICYC assersuutigalugu takoqqusaarutinik suliaqarpoq MIBB-imilu namminerisaminnik suliniartut ataqatigiissaarneqarlutik. Akunnitsinni nukittuffiit piginnaasallu atorluarlugt ataatsimut anguniagarput piviusunngortinniarparput, tassalu Kalaallit Nunaanni meeqqat atugarissaarnerunissaat. Suliniulli Nanubørnit suliniutigaat, isiginnaagassiarsuaq pilersinniarlugu annertuumik suliaqarsimalluni, Line Frederiksen oqarpoq.

Katuami februaarip 26-anni isiginnaartitsinissaarsuarmut suli bilitsit pisiarineqarsinnaapput.

Pilersaarutit suunersut uani takukkit www.katuaq.gl aamma www.nanuboern.gl.

Air Greenlandip timmisartuussiviani atisanik takutitsinermi nikorfalluni inissat 75 kronillit suli aamma pisiarineqarsinnaapput.

Isiginnaartitsinissaarsuarmi peqataanissamut periarfissaqanngikkaanni tapersiisoqarsinnaavoq SMS aqqutigalugu 1890-mut allalluni: NANU 25 taamaalillunil 25 kroninik tunisilluni

NANU 50 taamaalilluni 50 kroninik tunisilluni

NANU 150 taamaalilluni150 kroninik tunisilluni

Aamma Nanubørn kontoannut ikisisoqarsinnaavoq uunga nr. 6471 7848622.

Aamma februaarip 26-anni nal. 17 aamma 23.30 akornanni sianertoqarsinnaavoq, aningaasanik aalajangersimasunik tunisilluni, tassaniissappullu nammineq piumassutsiminnik sulisut eqqumiitsuliortullu tusaamasat oqarasuaatini akisarlutik.

Aningaasat katersorneqartut tamarmik meeqqat ornittagassaannut atorneqassapput.

Powered by Labrador CMS