Meeqqat ataataqanngitsut immikkut isiginiarneqarput
Pingasunngorpat Katuami tamanut ammasumik ataatsimiittoqassaaq, eqqartorneqassalluni meerarpassuit Meeqqat pillugit inatsit tunngavigalugu kingorsussisusaanatik ataataqartut qanoq pineqassanersut. Ataatsimiiinnermi aaqqissuussisuuvoq Anne Sofie Hardenberg.
Anne Sofie Hardenberg, atuakkami *Ataatamik ilungersuutimik' atuakkioqqammersoq meerarpassuarnut ataataqanngitsunut, "ersinngitsumik ataataqartunut" tamanut ammasumik ataatsimiinnissami suliniuteqartuuvoq. Meeqqat ilaat, meeqqanut inatsit naapertorlugu meeqqatut ataataqanngitsutut nalunaarsorneqarsimapput.
Juunip 1-ani 1963-p siornatigut Kalaallit Nunaanni uersakkat ataataminnik kingornussisussaatitaanngillat. Meeqqat ilaat tassaaput Kalaallit Nunaanni 1950-ikkunni 1960-ikkunnilu sanaartortoqaruttulermat angutit qallunaat arnallu kalaallit naapinnerisa inerittui, taamanikkut qallunaat sulisussat tuusintikikkaat Kalaallit Nunaannut suliartormata. Meeqqat taakku maannakkut inersimasuusut, ataatartik kingornussinnaanngilaat.
Kalaallit Nunaanni meeqqat pillugit inatsimmi, qallunaat meeqqat pillugit inatsisitoqaanit 1937-imeersumit assilisaasumi, (qallunaat nunaanni meeqqat pillugit inatsit assiginagu) aalajangersagaqarpoq, angut pilersuisussatut eqqartuunneqarsinnaasoq naak meeqqap ataataatut eqqartuuneqanngikkaluarluni. Taama pisoqarsinnaavoq naammaginartumik uppernarsarneqarsinnaanngippat, meeqqamut ataataasoq, akerlianilli aamma meeqqamut ataataasinnaalluarluni. Tamanna isumaqarpoq meeraq eqqartuussivikkoorlugu ataataajarneqarsinnaasoq.
Taamaattumik Anne Sofie Hardenberg Tida Ravn suleqatigalugu imminermisut inissisimasunut allanullu innuttaasunut Katuamut qaaqqusipput. Ataatsimiinneq aallartissaaq nalunaaqutaq 19.00.
Justitsministeriami ulluni makkunani Kalaallit Nunaanni ilaqutariinnermut inatsimmik nutarterileruttorput, Namminersornerullutik Oqartussat kissaateqarnerisigut. Tassunga atatillugu siunertaavoq Danmarkimi meeqqat pillugit inatsisip, juulip aallaqqaataani 2002-mi atuutilersup Kalaallit Nunaanni atuutinneqalernissaa. Justitsministeriap aamma meeqqanut uersakkanut tunngasut samminiarpai.