Illuikkiat nutarterneqassapput

Arctic Hotelip illuaraatai iluikkatut isikkullit nutarterneqarlutillu nutaamik pequtsersorneqassapput.

Hotel Arcticimi Ilulissaniittumi illuikkiat nutarterneqassapput. Assi: Leiff Josefsen.

Sanasoq Brunder Brønderslevimeersoq immikkut ittumik suliakkerneqarsimavoq. Hotel Arcticimi Ilulissaniittumi aluminiumik illuikkiat tallimat sanasup nutartissavai.

Taama allappoq nordjyske.dk.

Nicolaj Jørgensenip, sanasuniit Brunderimeersup illussanik titartaasarfik Skarnvad Brønderslevimeersoq suleqatigalugu pequtilersuineq qanoq isikkoqassanersoq suliarisimavaa, aamma suliffeqarfiit Brønderslevimeersut illuikkiani atortussanik pisiniarfigineqarput.

Suut tamarmik illuikkianut qaarajuttunut naleqqussarneqarlutik ilusilersorneqarsimapput. Siniffiit campingvognini atorneqartartut ipput, unnuami siniffiullutik, ullukkullu nalaasaarfiullutik.

Ajornaquteqanngitsumik illuikkiami issiasinnaapput inuit arfinillit, marluk unnuisinnaallutik. Aamma pilersaarutaavoq illuikkiat tallimat rockwoolimik 100 millimeterimik oqorsaaserneqassapput, kingornalu aluminiumik qalleqqinneqarlutik.

Illuikkiat seqernup kissaanik kiassarneqarnissaat sulissutigineqarpoq.

Illuikkiat tallimat apriilip aallaqqaataa tikitsinnagu naammassisimassapput.

Powered by Labrador CMS