Skip to main content

Nuna tamakkerlugu meeqqanut katersuiniarneq

Nina aamma Malik, Linda, Alien Beat Club aamma Basim X Factorimeersut, Dennis Knudsen, Julie, Søs Fenger, Isaksen Design aamma Charlotte Sparre Design tassaapput tusaamasat, nuna tamakkerlugu kalaallit meerartaannut katersuiniarnermi peqataaniartut.

Nunatsinniit Danmarkimiillu nipilersortartut tusaamasat, qitittartut, ilusilersuisartut, atisanik takutitsisartut 2PM-imeersut, ilaatigut Lykke May, kalaallit atisanik takutitsisartut kiisalu nunatsinni inuussutissarsiutilit, nunatsinni meeqqanut suliniaqatigiiffiit sisamat Nanu Børn, Meeqqat Inuunerissut/Bedre Børneliv, ICYC aamma Red Barnet peqatigalugit februaarip 26-anni nuna tamakkerlugu toqqaannartumik Tv-kut aningaasanik katersuiniassapput, nunatsinni meeqqat atugaasa pitsanngorsarneqarnissaannut atorneqartussanik.

Nuna tamakkerlugu katersuiniarnermi ilaatigut takuneqarsinnaassapput qallunaaq quiasaarisartoq Anden, )Anders Matthesen), Nina aamma Malik, meeqqat erinarsoqatigiit, Linda (X Factorimi ajugaasoq), Alien Beat Club & Basim aamma X Factorimeersut, Dennis Knudsen, Julie, Søs Fenger, Isaksen Design, Lennert Design, Charlotte Sparre Design, Nuuk Posse, Ulf Fleischer allarpassuillu.

Tv-kut aallakaatitsieq toqqaannartoq

KNR-ip Nuuk TV-llu ilusilersuisartut nipilersortartullu takutitsillutillu tusarnaartitsineranni toqqaannartumik nuna tamakkerlugu isiginnaarneqarsinnaasumik aallakaatitsinissaq isumagissavaat.

Aallakaatitsinerup nalaani sianerfissaqarpoq, nunatsinniit nunanillu allaniit tusaamasat isiginnaartunit sianertoqaraangat oqarasuaammik akisassalutik. Taassuma saniatigut aamma SMS aqqutigalugu aningaasanik tunisinissamik periarfissaqassaaq.

Isiginnaartitsineq toqqaannartoq

Katersuineriarneq aamma taperserniarlugu isiginnaartitsinissamut bilitsimik 800 koruuninilimmik pisisoqarsinnaassaaq, taannalu februaarip 26-anni ingerlanneqassaaq. Isiginnaartitsineq ualikkut tallimaniit unnuap qeqqanut ingerlanneqassaaq, bilitsilu atorlugu Air Greenlandip hangariani atisanik takutitsinerit aliikkusersuinerillu peqataaffigineqarsinnaapput (Katuamiit uterlugulu angalaneq ilanngullugu) kiisalu Katuami nerersuaqatigiinneq tusaamasallu aliikkusersuinerat ilaallutik.

Taamaallaat atisanik takutitsineq peqataaffiginiaraanni aamma tamanna periarfissaqassaaq. Taanna Air Greenlandip hangariani pissaaq minutsinillu 45-nik sivisussuseqarluni, taannalu inersimasunut akeqarpoq 75 kroner meeqqanullu 50 kroner.

Meeqqat aamma periarfissaqassapput Tv-mi tusaamasat nuannaartorisamik takunissaannut. Arfininngorpat februaarip 27-anni Katuap torsuusarsuani akeqanngitsumik meeqqanut inuusuttunullu ABC, Linda, Basim, Julie aamma Søs Fenger, Nuuk Posse, allallu tusarnaartitsissapput.

Aaqqissuisut tassaapput Nanu Børn, MIBB, ICYC aamma Red Barnet Grønlandimiit ikiorteqarlutik. Peqatigiiffiit taakku sisamaallutik 2009-mili ataavartumik suleqatigiipput, suelqatigiinnerallu 2010-mi ingerlaannarpoq.

– Nunatsinni meerarpassuit naammattumik isumagineqartillu tapersersorneqanngillat. Meeqqat inuusuttullu taakku toqqissisimanissaannut qinigassaqarnissaannullu periarfissanik anertusaavigineqassapput. Februaarip 26-anni peqataanermikkut innuttaasut talersiisinnaapput, aaqqissuisut tusagassiuutitigut nalunaarummi allapput.

Aningaasat katersorneqartut tamakkerlutik nunatsinni meeqqat pitsaanerusunik atugassaqarnissaannik suliniuteqartunut sisamaasunut nakkartinneqassapput. Kikkut tamarmik akeqanngitsumik sulissapput kajumissusertik naapertorlugu.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER