Uuliasiorluni qillerinermi innuttaasut akuunerulissapput

Cairn Energy 2010-p ingerlanerani Qeqertarsuup Nuussuullu kitaani immami uuliasiorluni qillerisussaq, marsip qiteqqunnerani innuttaasunik ataatsimiisittisarniarput apeqqarissaarfissaqartumik.

Uuliasiorluni qillerisoqannginnerani Cairn innuttaasunik ataatsimiisitsiniarput. Assi: ERIK.

Nunatsinni uuliasiorluni qillerisoqartillugu pisortanit piumasaqaataavoq, inuiaqatigiinnut saqqummiussiffiup nalaani susassaqartut peqatigalugit ataatsimiinnerit ingerlanneqartarnissaat. Qillerinerit inuiaqatigiinni atasinnaanersut nalilerniarneranni ataatsimiinnerit taakku ilaapput.

Pisortat Cairn Energy taassumalu suleqatai suleqatigisinnaasaminnik allanillu soqutigisalinnik ataatsimeeqateqassapput, sukumiisumik paasissutisseeqatigiiffiusumik, suliamut attuumassuteqartut pillugit itisiliilluni akisassanik apeqquteqartoqarsinnaassalluni. Suliap ingerlanerata immikkoortua taanna pissaaq februaar 2010-mi sapaatip akunneri siulliit marluk.

Kingorna Cairn nalunaarusiussaaq, qulaajarneqassalluni nunatsinni suliffeqarfiit, sulisussat nunaqavissut, ilinniarnissamut periarfissat il.il pitsaanerpaamik qanoq periarfissinneqarsinnaanersut.

Cairnip aamma VVM-mi misissuinerit naammassissavai, tassalu isumannaallisaanikkut, peqqinnissamut avatangiisinullu tunngatillugu ulorianaateqarsinnaasut tamarmik takussutissaqartumik qulaajarneqarfiat, nunarsuarmi tamarmi pitsaanerpaamik suleriaaseq tunngavigalugu. Aamma upalungaarsimanissamut pilersaarummik anertuumik suliaqartoqassaaq, tassungalu atatillugu qulakkeerneqassaaq upalungaarsimanissamut aningaasatigut qulakkeerisoqarsimanersoq pisariaqalissappat.

Marsip aallartinnerani 2010 misissuineq nalunaarusiarlu tamanut tusarniaassutigineqassaaq, tusarniaanerullu nalaani innuttaasunik ataatsimiititsisoqartassaaq, misissuineq nalunaarusiarlu saqqummiunneqartassalllutik innuttaasullu apeqquteqarsinnaallutik suliamullu tunngatillugu ernumassutigisinnaasaminnik saqqummiussillutik.

Innuttaasunut ataatsimiititsinerit ingerlanneqartinnagit innuttaasut nalunaarusiamik atuarnissaminnik periarfissaqassapput, ilimagineqarporlu innuttaasunik ataatsimiititsinerit aallartissasut marsip 15-ata missaani 2010.

Aallarniutaasumik ataatsimiinerit ingerlanneqassapput februaarip aallartinnerani, innuttaasunillu ataatsimiisitsinerit marsip qeqqani ingerlanneqarlutik, Nuummi, Ilulissani, Aasianni, Qeqertarsuarmi, Qasigiannguani, Kangaatsiami, Uummannami Sisimiuni Kangerlussuarmilu.

Powered by Labrador CMS