World of Greenland kiserngorupput
Takornariartitsiviup Kangerlusuarmut takornariat 80 procentii sullittalissavai.
Taama allappoq nutarsiassaqartitsivik Travel People, taannalu isumaqarpoq Kangerlussuaq Tourismip akiliisinnaajunnaarnerata kingunerissagaa takorneriaqarnerup Kangerlussuarmi katersuunnissaa.
- Sapaatip akunnerani kingullermi Kangerlussuaq Tourism akiliisinnaajunnaarmat angalasussat World of Greenlandimut tuaviortumik nuunneqarput, taakkulu Kalaallit Nunaani Kangerlussuaq aqqusaarlugu angalatitsinerup 80 %-ia sullitaraat, Travel People allappoq.
Takornariaqarnermik suliaqartut Travel Peoplelimut oqarput, akiliisinnaajunaarnerup ulapaarfiup avataani pinera iluatsitsinerusoq. Assersuutigalugu aggustimi pisimassagaluarpat paatsiveerunnersuaqarsimassagaluarpoq, ingammik umiarsurnut takornariartaatsinut tunngatillugu.
Albatros Travel, World of Greenlandip 40 %-ianik piginnittoq, qanittukkut million koruunit arlallit atorlugit Islandimi biilinik assakaasunik sisamanik ingerlatsisulinnik inniminniivoq. Ilimagineqarpoq taakku World of Greenlandimit isumagineqassasut.
Taassuma saniatigut ilimagineqarpoq akiliisinnaajunnaartut pigisaanik agguaassisissap eqqartuussissuserisup Peter Schriverip Nuna Advikaterniittup suliffeqarfiup akiliisinnaajunnaartup pigisai tuniniassagai.
- Taamaalilluni Kangerlussuarmi umiarsualiviup mittarfiullu akornanni angallassissutinik amigaateqartoqassanngilaq, imaluunniit Kangerlussuup eqqaani angalaarnissamut, Søren Rasmussen, Albatros Travelimi pisortaaneq World of Greenlandimilu siulersuisuini siulittaasoq oqarpoq.