Inuttaasunik sullissineq pitsanngorsarpaat

Kommunerujussuarni sullinerup piorsarneqarnissaanut suliniuteqarfik 'Sullissivik' kommuninut qaniliallappoq.

Sullissivik namminersornerullutik oqartussat allaffiiniit kommunit kattuffiata allaffiinut nooqqammerpoq.

KANUKOKA-mut nuunnissaq sivisuumik kissaatigineqarsimavoq. Aallaqqaammulli eqqarsaatigineqarsimavoq KANUKOKA-mi siunnersortit aqqutigalugit kommuninut qaninnerusumik sulinissaq, kommunit katuffiat nittartakkamini allappoq.

- Taamaaliornikkut kommunit ingerlatsinerannut tulluarnerusumik ataqatigiissaagaanerusumillu aaqqissuussisoqarsinnaavoq, soorlu sullissivinni sulisunik pikkorissaasarnissat ilisimasanillu katersuinerup eqaannerusumik ingerlanneqarnissaat eqqarsaatigalugit, suliniutinik aqutsisoq Hans Christian Sværd oqarpoq.

Projekt Sullissivik maanna pingasunik sulisoqartoq Aaqqissuussaanermik Isumalioqatigiissitat isumaliutissiissutaat 2005-imeersoq pisortat suliassaqarfiisa annertuumik aaqqissuuteqqinneqarnissaannik kaammattuuteqarfiusoq tunngavigalugu pilersinneqarsimavoq.

Suliniutip siunertaraa pisortat sullissinerata pitsanngorsarlugulu sukkanerulersinneqarnissaa, aammalu pisortat ingerlatsiviisa innuttaasunut qaninnerulersinneqarnissaat.

Suliniut tamanna pingasutigut piviusunngortinniarneqalerpoq. Siulleq tassaavoq internetikkut saaffiginnittarfik - www.sullissivik.gl - pisortat ingerlatsinerat pillugu ilisimasassanik tamanik aallerfiusinnaalersussaq, aallaqqaammut nunatsinni tamarmi sullissivinni sulisut eqqarsaatiginerullugit.

Suliniutip immikkoortuata aappaa tassaavoq suliassaqarfinni tamani ilisimasassat innuttaasunut attuumassuteqartut tamaasa katersorlugillu allaaserineqarnissaat.

Suliniutip immikkoortuisa pingajoraat nunatsinni sullissivinni tamani 80-it missaanniittussani sulisut sulinermi atortussanik innuttaasunillu kiffartuussinissamik ilinniartinnissaat.

Suliniut 2008-p naalernerani aallartinneqartoq kommunit aamma Namminersorlutik Oqartussat aveqatigiillugu aningaasaliiffigisimavaat.

Powered by Labrador CMS