Tusaamasat kalaaliaqqanik tapersersuipput

Arfininngorpat januaarip 30-ani Glostrup hallen isiginnaartitsisartunik, assammik arsallammannik aliikkusersuisartunillu tusassasanik ulikkaassaaq, kalaaliaqqat iluaquserniarlugit takutitsinersaarsuaqalerpat.

Ilaatigut Rasmus Lyberthip Foreningen Grønlandske Børn tapersersorpaa. Aajuna DR-p tusarnaartitsiviani tusarnaartitsisoq. Assi: Finn Jørn Jakobsen

Mads Mikkelsen, Jan Gintberg, Per Skaarup aamma Erik Veje Rasmussen tusaamasat ilagiinnarpaat, Glostupimi assammik arsartarfimmi takutitsinermi, Peqatigiiffiup Kalaallit Meerartaasa aaqqissugaanik ikiuiniutigalugu alikkusersuilluni takutisisoqalerpat.

Tassani isiginnaartitsisartut tusaamasat soorlu Mads Mikkelsen, Nils Olsen, Nikolaj Kopernikus assammillu arsartartutoqqat nuannarineqaqisut Christian Stadil, Jens-Erik Roepsdorff aamma Hans- Henrik Hattesen peqatigiillutik AG Håndboldimi Oldstarsinut aliikkusersuillutik unammissapput.

Unammineq ingerlanneqassaaq arfininngormat nalunaaqutaq 14.00, takutitsinissaarsuullu ilagalugu, tassani isiginnaartitsisartut, timersortartut, quiasaarisartut, nipilersortartullu inuussutissarsiutinillu ingerlatsisut kattullutik aningaasanik katersuiniassallutik, kalaallit meerartaasa isumagininikkut ilungersunartorsiortut pitsaanerusumik inuuneqarnissaannut atorneqartussanik.

Ilaqutariinnik attaveqaataasunik suliniuteqarnikkut Kalaallit Nunaanni meeqqat pitsaanerusumik peroriartornissaat inuunerinnissaallu qulakkeerniarneqarpoq, Glostrupimilu aaqqissuussinermi sinneqartoorut tamakkiisoq siunertamut tassunga atorneqassaaq.

”Suliniutip pilersinnissaa pingaartupilussuuvoq, Kalaallimmi Nunaanni suli meqqat amerlaqaat, ilaqutariinni qajannartuni najugaqartut. Ilaqutariinnik attaveqaataasussanik pilersitsinikkut meeqqat taakku inuunerinnerulersinnaapput". Foreningen Grønlandske Børnimi allattaaneq Tina Frausing oqarpoq.

Suliniut aallarnisarneqarnermini 500.000 koruuninik tunissuteqarfigineqareersimavoq - taakku TV2-mi juullimut ammartagaliortunit angutinit inuusuttunit marlunnit Sebastian Aagaard-Williams aamma Rasmus Ottimit aallakaatitakkut ”Hvem vil være millionærikkut” isertinneqarsimapput.

Takutitsineq aamma kalaallit assammik arsattartartuisa AG Håndboldillu tusaamasanik ilaqaqisup unamminerannik imaqassaaq.

Aamma Jan Gintberg naapissinnaavat nipilersortartorlu kalaaleq Rasmus Lyberth allarpassuillu.

Ulloq taanna aamma tupaallannartunik pisoqassaaq soorlu unamminernik, isiginnaartorlu iluatsitsisoq Kalaallit Nunaannut inuit marluk angalanissaanik eqquisinnaavoq.

Powered by Labrador CMS