Blok P-mi najugallit Qinngutsinni inissinneqassapput

Nuummi Blok P-p isaterneqarnissaa pillugu aalajangiinerup kingunerisaanik ineqarnermut naalakkersuisoqarfik inissianik 84-inik pisinissamut isumaqatigiissusiorpoq.

Illut immikkoortut arfinillit suliffeqarfimmit Permagreenimit sananeqartut pineqarput. Illut tamarmik immikkut 14-inik inissiartaqarput, agguataarlutik marlunnik initallit arfinillit 62 kvadratmeterit miss. angissuseqarlutik aamma pingasunik initallit arfineq pingasut 78 kvadratmeterit miss. angissuseqartut.

Inissiat Pisissiani sananeqassapput. Inissiat affaat 2011-mi iserterfigineqarsinnaassapput, sinnerilu 2012-imi iserterfigineqarsinnaassallutik.

Sanaartukkat iserterfigeriaannaallutik kvadratmeterimut 19.545 koruuninik akeqassapput, inissiallu naammassineqarneranni tiguneqarnerannut atatillugu aatsaat akilerneqassapput, ineqarnermut naalakkersuisoq Jens B. Frederiksen oqarpoq.

- Blok P-mi maannakkut attartorlutik ineqartut inissianut nutaanut salliusussaatitaassapput. Inissiat inissiatut attartortittakkatut neqeroorutigineqassapput, kisiannili attartortut inissianik inissiatut nammineq pigisassatut niuernermut akiusumik akilerlugit tigusinissamik kissaateqarpata, tamatumunnga naalakkersuisut akornusiissanngillat, Jens B. Frederiksen oqarpoq.

Blok P-mi ineqartut tamarmik 2010-mi ukiakkut aamma 2011-mi upernaakkut ineqarnermut siunnersortinit pulaarneqassapput, ataasiakkaanut iliuuseqarnissamut pilersaarusiornermik ikiuuttussanik.

Inissiani pingasunik initalinni attartornermut akiliutissaq 5.150 koruunit missaanniissaaq, marlunni initalinni 4.100 koruunit missaanniissasoq naatsorsuutigineqarpoq.

Aningaasaqarnermut ineqarnermullu tunngasunik siunnersuisoqassaaq, attartortullu kissaataannik ingerlateqqinnissamut ikiorsiisoqassalluni.