Juaaka: Kalaallit Nunaanni nunaqarfiit iliuuseqarfigineqarnissaat isumassaarunneqarpoq

Inuiaqatigiinni oqallinnermut peqataalluartoq Juaaka Lyberth isumaqarpoq Kalaallit Nunaanni nunaqarfiit qanoq iliuuseqarfigineqarsinnaanerat isumassaarunneqartoq.

- Ilua'tungaatigut isumaqarpugut tamanna akisuallaartoq, nunaqarfillu matuneqartariaqartoq. Aappaatigut taamatut iliornissap piviusunngortinneqarnissaa merseraarput, Juaaka Lyberth Radioaviisimut oqarpoq.

Ukiut tamarluinnaasa millioninik marlunnik akileraarutigigut isertitanik Moiusaq aningaasartuutaasarpoq.

Qineqqusaarnerup nalaani Palle Christiansen, Demokraatit, eqqarsaat saqqummiuppaa nunaqarfiit 100-t inorlugit inuuttaasullit matuneqassasut, tamakku inuiaqatigiinnut annertuvallaamik aningaasartuutaammata.

- Uanga isumagama malillugu piffisami qanittumi nunaqarfinnik matusisoqarnavianngitsoq. Isumaqarpunga tamanna IA-mit partiitut nunaqarfinnik matusisutut eqqaamaneqarnissaq ornigineqanngitsoq, Juaaka Lyberth naliliivoq.

Kisiannili isumaqarpoq politikikkerit taamatut eqqarsartut.

- Aningaasaqarnermut Inatsit tunngavigalugu iliuusissat arlartut takutippaat, Naalakkersuisunit innuttaasunik nunaqarfiniit illoqarfinnut noorartoqarnissaa anguniarneqarneqartoq.

Nunaqarfinni minnerusuni inuussutissarsiornerup ineriartortinneqarnissaa aallartinniarlugu Kommuneqarfik Sermersuumik bormester Asii Chemnitz Narup, IA, ukiarmi siunnersuuteqarpoq Naalakkersuisut aningaasanik amerlanngitsunik taarsigassarsisitsilernissamik pilersitsissasut. Eqqarsaatigineqartoq tassaavoq inuttaasut aningaasat ikittunnguit taarsigassarsiatik ukiup affaata imaluunniit ataatsip ingerlanerani taarsersinnaassagaat.

Aningaasanik amerlanngitsunik taarsigassarsisinnaaneq nunaqarfinnut periarfissiivoq, kisiannili apeqqutissanik pilersinngitsuunngilaq, Juaaka Lyberth naliliivoq:

- Eqqarsaatigeriartigut mersortarfik imaluunniit aalisartoq, aningaasanik amerlanngitsunik taarsigassarsisinneqarput nunaqarfimminni namminneq suliffeqarfimmik pilersitsiniarlutik. Kisiannili pineqartup tuniniaavissaa sumiippa? Ajornartorsiut tamatumunnga tunngavoq iluarsiuminaatsuussaaq. Uanga isumaqarpunga tamanut assigiimmik iluarsiisoqarsinnaanngitsoq, Kalaallit Nunaanni sineriapput taamak isorartutigimmat taava Kujataani iluarsiineq imaassinnaavoq Avannaani atorsinnaanngitsoq.

Piujuaannartitsinermut tunngasunik siunissami aamma pilersitsoqarsinnaanera Juaaka Lyberthip takorloorsinnaavaa, soorlu nunaqarfiit minnersut erngup nukia atorlugu nukissiuuteqarlernerisigut.