2008-mi aallarartut suil amerlaqaat

Kalaallit Nunaannit aallarartut nuuttunit amerlanerupput. 2008-mi ukiuni kingullerni qulini ukiumi ataatsimi Nunatsinnit aallarartut aatsaat taamak amerlatigaat.

Nunatsinnit nuuttartut amerliartuinnarput. Ass.: Leiff Josefsen

2008-mi inuit nunatsinnit nuuttut 3.175-iupput. Taakkunannga 1.560-t nunatsinni inunngorsimapput. Inuit nunatsinnut nuuttut 2.537-iupput, taakkunannga 907-it nunatsinni inunngorsimasuullutik. Tassa nunatsinnit aallartut nunatsinnut nuuttunit 638-inik amerlanerupput, ukiunilu qulini kingullerni amerlanerpaat tulleralugit.

Tamanna takuneqarsinnaavoq saqqummiussami ´2008-mi Innuttaasut Nikerarnerat", Kalaallit Nunaanni Naatsorsueqqissaartarfiup quppernermini nittartakkami www.statgreen.gl-imi tamanut saqqummiuteqqammigaani.

2008-mi nuunnerit katillugit 20.639-iupput. Taakkunannga 2/3-t missaanniittut nunap immikkoortuata iluani nuuttuupput, ukiuni kingullernisut iinnarlutik. 2008-mi nuuttut 2007-imi nuuttunut sanilliullugit ikilerialaarsimapput.

2008-mi nunaqarfinniit illoqarfinnut nuuttut 1.282-iupput, illoqarfinniillu nunaqarfinnut nuuttut 1.028-iullutik, tassa 2008-mi nunaqarfimmiit illoqarfimmut nuuttut agguaqatigiissillugu 254-iullutik.

Inuk qaammatisiutip ukiuani arlaleriarluni nuussinnaavoq. Nuunnerit 20.639-it ingerlanneqarsimapput inunnit 14.807-init. Tassa Kalaallit Nunaanni innuttaasut sisamararterutaat 2008-mi ikinnerpaamik ataasiarlutik nuussimapput.

2008-mi meeqqat inunngortut 834-iupput toqusullu 428-iullutik. Tassa inuusut toqusunit 406-inik amerlanerupput.

Innuttaasut amerlassusaat ukiut sisamassaat ingerlatiinnarlugu ikileriarput, 1. januar 2005-imi 56.969-iniit 2009-mi 56.194-inut.

Powered by Labrador CMS