Tunumiut sumiorpaluutaat politikkikkut sammineqalerpoq

Tunumiut oqaasiisa ataannarnissaat siunertaralugu Kommuneqarfik Sermersooq suleqataarusuppoq.

– Suleqatigiissitaliorpugut tunumiut kulturiannik nalunaarsuisussamik, ilaatigut tunumiusut oqaatsit sammineqarlutik, Kommuneqarfik Sermersuumi borgmesteri Asii Chemnitz Narup oqarpoq. Ass. Leiff Josefsen

Juunip 16-ianni 2009 Kommuneqarfik Sermersuumi kommunalbestyrelse aalajangiivoq tunumiut kulturiata nalunaarsornera aallartinniarlugu. Siunertaavoq tunumiut kulturiat oqaasiilu pillugit ilisimasanik katersinissaq, nalunaarsuillunilu siammarterinissaq kiisalu kulturip ataannarnissaanut suliniutinik pilersitsilluni.

– Kommuneqarfik Sermersuumi tunumiut oqaasii sumiorpaluutaapput pingaaruteqartut. Suleqatigiissitamik pilersitsivugut tunumiut kulturiannik nalunaarsuisussamik, ilaatigut tunumiut oqaasii qitiutillugit. Ilisimatusarfimmik suleqateqarpugut oqaatsit tungaatigut suliap pitsaasuunissaa siunertaralugu, borgmester Asii Chemnitz Narup oqarpoq.

Marsip aallartinnerani tunumiut kulturiat oqaasiilu pillugit ilisimasanik nalunaarsuinissamut, katersinissamut ingerlatitseqqiinissamullu tunngatillugu suleqatigiissitaq innersuussaqassaaq.

– Tunumiut kulturiata oqaasiisalu kulturikkut siumut sammisumik iliuuseqarfiginissaannut sakkussatut suleqatigiissitap innersuussutai atorniarpavut, borgmester Asii Chemnitz Narup oqarpoq.

Powered by Labrador CMS