Aatsitsiviliornissaq pillugu ataatsimiinnerit nutaat
Namminersorlutik Oqartussat aamma Alcoa sapaatip akunnerini marlunni aggersuni Maniitsumi aluminiumik aatsitsivliornissaq pillugu innuttaasunik ataatsimiisitseqattaassapput.
Aluminiumik aatsitsiviliornissamut tunngatillugu paasissutinnik nutaanik pingaaruteqartunik sapaatip akunnerini marlunni tulliuttuni saqqummiisoqassaaq, taama ilimasaarivoq ineqarnermut, attaveqarnermut angallannermullu naalakkersuisoqarfik tusagassiuutitigut nalunaarummi.
Tamanna pissaaq marloriartarluni Sisimiuni, Maniitsumi Nuummi Kangerlussuarmilu innuttaasunik ataatsimiisitsinerni.
Paasissutissat nutaat inuiaqatigiinnut tunngapput, tassalu aningaasaqarneq innuttaasullu suliartorniarlutik nuussinnaanerannut periarfissat. Aamma erngup nukiliorfissat pillugit paasissutissiisoqassaaq kiisalu suliniutip kingunerisaanik avatangiisinut sunniutaasussat pillugit.
Innuttaasunik atatsimiisitsinerit nutaat ukioq manna inatsisartut aluminiuliorfissaq pillugu isummernerannik kinguneqassapput.
Uani sapaatip akunnerani innuttaasunik ataatsimiisitsinerni eqqartorneqassapput aluminiuliorfissamut atatillugu nalinginnaasumik inuiaqatigiinut pissutsit. Innuttaasunik ataatsimiisitsinerit aaqqissuunneqarput Namminersorlutik Oqartussat Greenland Developmentip aamma Qeqqata Kommuniata suleqatigiinnerisigut.
Sapaatip akunnerani tullermi innuttaasunik ataatsimiinnerni eqqartorneqassapput teknikkimut avatangiisinullu tunngatillugu suliassat aalajangersimasut. Ataatsimiinnerit taakku aaqqissuunneqassapput Alcoamiit Greenland Developmentimiillu Qeqqata Kommunia suleqatigalugu.
Sisimiuni innuttaasunik ataatsimiisitsinerit ingerlanneqassapput jaunaarip 11-ani aamma 20-ani Taseralimmi, Maniitsumi katersortarfimmi januaarip 13-ianni 19-iannilu, Nuummi januaarip 14-ianni 18-iannilu, kiisalu Kangerlussuarmi januaarip 21-anni.
Innuttaasunik ataatsimiisitsinerit tamarmik aallartissapput nalunaaqutaq 19:00.