Utaqqiisaasumik ineqarnermut akiliisarnissaq suli aalajangiivigineqanngilaq
Suli aalajangerneqanngilaq, qaqugu qanorlu annertutigisumik utaqqiisaasumik ineqartut inigisaminnut akiliisalissanersut.
Utaqqiisaasumik inimik atuinermut akiliinermi isertitassatut 4 millioner koruunit aningaasanut inatsimmi missingersuutaapput.
Taamaattorli suli ilisimaneqanngilaq, kikkunnut, qaqugu qanorlu annertutigisumik utaqqiisaasumik akiliisalernissaq atuutilissanersoq, knr.gl allappoq.
Siunnersuuteqartoqarsimavoq kvadratmeterimut 580 koruuninik akiliisoqartassasoq. Tamannali suli aalajangerneqanngilaq.
Sulisut kattuffii peqatigalugit tamanna Namminersorlutik Oqartussat eqqartoqqaartussaavaat. Tamannalu knr.gl naapertorlugu pissaaq januaarip ingerlanerani.