Nunap immikkoortuini peqqinnissaqarfiit nutaat mianersoqqussutigai

Peqqinnissaqarfiit immkkoortui angisoorsuit nakorsanit peqqissaasunillu ornigineqarneq ajorput.

Tamaattumik naalakkersuinermik suliallit peqqinnissaqarfiit immikkoortuinut tallimanut, peqqinnissaqarfiup nutaanik aaqqissuuteqqinnerani pilersinniarneqartunut, sulisussarsiornertik ajornakusoortissinnaavaat.

Taama Qaqortumi nunap immikkoortuani nakorsaq Lars Klenow KNR-radioaviisimut mianersoqqusivoq.

- Ajornartorsiut angisooq tassaavoq nunap immikkoortua nakorsat nakkutigisassaat isorartuallaarmat, taamaattumillu amerlaqisut qinnuteqarusunneq ajorput, Lars Klenow oqarpoq.

Takorloorsinnaavaa peqqinnissaqarfimmik aaqqissuusseqqinneq ima kinguneqarsinnaasoq, napparsimasut nakorsanit peqqissaasunillu ullumikkorniit allanngorarnerujussuarniit naapitaqartarnissaat, peqqutigalugu peqqinnissaqarfimmi sulisut illoqarfinnit eqqaamiunit timmisartuunneqartartussaammata.

Inatsisartuni naalakkersuinermi suliallit upernaamut peqqississaqarfiup aaqqissuuteqqinnissaat eqqartussavaat. Maannakulli nunap immikkoortuani Qeqertarsuarmi nunattalu qeqqani misiliutigalugu suliniutit marluk ingerlanneqalereersimapput, decembarimi Naalakkersuisuniit tusagassiuutitigut nalunaarut naapertorlugu.

Januaarip aallaqqaataata 2011-ip tungaanut nunap immikkoortuini misileraalluni suliniutit ingerlassapput, taamanikkussamulu peqqinnissaqarfimmik tamarmik aaqqissuussineq nutaaq atuutilissaaq. Aaqqissuusseqqinnerup iluserilerumaagassaata pilersaarusiorneqarneranut misileraanermi misilittakkat ilaatinneqassapput.

Ullumikkut Kalaallit Nunaat peqqinnisaqarfiup immikkoortuinut 16-inut agguataarneqarsimavoq. Peqqinissaqarfiup immikkoortui ataasiakkaat peqqissaasumik aqutsisumik immaqalu ingerlatsinermi pisortamik aqunneqartarput, tamarmillu Nuummi peqqinnissaqarfiup sulinikkut allaffissornikkullu aqutsisoqarfiup ataaniipput, peqqinnissamut nittartagaq peqqik.gl naapertorlugu.

Maannakkut peqqinnissaqarfiup aaqqissuussaanera ukiunik 80-inik pisoqaassuseqarpoq.