Avannaarsuani issittumi assaat kissartut

Aallussilluartoq Ann Andreasen - Uummannami ukiuni 22-ini børnehjemmimi pisortaq - 50-iliivoq.

Ann Andreasen assigiinngisitsivoq. Ass.: Jean Michel Huctin.

Eqqarsaatigissagaanni meerarpassuit Uummannaq Børnehjemmimut pigaangamik qanoq tunuliaqutaqartarsimanersut, tupinnarluinnarpoq kingorna qanoq ingerlalluartigisarnerat. Immaqa universitetimut pineq ajorput, inuuneqalersarpulli qinngaqqunnanngitsumik. Aallussilluartut assigiinngissuteqartitsipput.

Taamatut atugassiamut Socialpædagogen Isumaginninnermut Naalakkersuisoq Maliina Abelsen oqarpoq, atuagassiami tassani normumi kingullermi kalaallit isumaginninnermut politikkiat sammineqarluni. Atuagassiami Uummannami Børnehjemmi nersorniarneqarpoq meeqqanik paaqqinnittarfiit ilaattut ilaatigut puisinniarnikkut, qimussimik angalasarnikkut, perorsaaniarluni angalanertigut, nipilersornikkut, eqqumiitsuliornikkut assitigullu meeqqat børnhjemmimiittut, ilorraap tungaanut aallartikkuminaakkaluartut, ajunngitsumik inuuneqalersillugit.

Børnehjemmimi perorsaanikkut sulineq aqunneqarpoq Ann Andreasenimit sulisunillu ataqatigiilluartunik, suliaminnik inooriaatsitut isiginnittunik, 8-miit 16-imut atorfittut isiginninnatik. Ann Andreasen - sapaatippat 50-iliisussaq ukiunilu 22-ni Kalaallit Nunaanni børnehjemmit avannarpasinnersaanni pisortaasimasoq - innuttaasunit imatorsuaq ilisimaneqanngilaq. Imminut nittarsarniartartuunngilaq. Perorsaanikkulli sulisut akornanni nunap iluani avataanilu børnehjemmimi sulinera angusaalu arajutsineqarsimanngillat. Siorna septembarimi Ann Andreasen Menighedernes Dagsinstitutioner-imit Gerda-prisen-imik nersornaaserneqarpoq, tassani ilaasortaallutik ulluunerani paaqqinnittarfiit 200-t. Kattuffiup generalsekretæria Charlotte Biil, ilaatigut oqarpoq:

Ann Andreasenip meeqqat sanngiitsut uummammiorai naapittarlugillu isumassuinermik, asanninnermik isumassarsiornermillu. Sulinera nalissaqanngilaq piffissami, meeqqat annertusigaluttuinnartumik tunisassiornermi tapertaannartut isigineqaleriartorneranni. Sulineralu pivoq Kalaallit Nunaata kulturikkut kingornussai ataqqilluarlugit, tamanna isigigamiuk meeqqat kinaassutsiminnik ilinniarnerminni pingaaruteqarluartutut.

Uummannami Børnehjemmi 25-nik sulisussaqartinneqarpoq meeqqanullu 27-inut inissaqarluni,maannakkulli meeqqat inuusuttullu 3-niit 31-inut ukiullit 35-it tassani najugaqarput. Børnehjemmimi ilassinnittoqassaaq sapaatiuppat nal. 14-17.

Powered by Labrador CMS