Air Greenlandimi sulisut akiuussutissamik kapitipput
Timmisartortitseqatigiiffik nualluummut A-mut pitsaaliuivoq.
Ukiumi juullimut angallanneq pissangajakulasarpoq. Angalasut kingulliit juullertinnagu ornitaminnut apuutissappat, imaluunniit angerlarsimaffimminnit ungasissorujussuarmi ingerlaqqissinnaajunnaassappat?
Sila tamatigut naatsorsoruminaatsuusarpoq, ukioq mannali nualluummik nappaalanerup aamma juullimi angallanneq ulorianartorsiortippaa.
Air Greenland tamatumunnga pakkersimaarpoq, timmisartortartut timmisartumilu saqisut aammalu nassatanik usilersuisartut uuttortaasartullu nappatsaaliorlugit.
– Timmisartortitseqatigiiffimmi nakorsarput isumasioqatigalugu sulisuvut qitiusumik inissisimasut tamaasa nualluummut A-mut (H1N1) kapitinnissaannik neqeroorfigaavut, Air Greenlandimi timmisartortitsinermi pisortaq Wilhelm von Platen sermitsiaq.gl-imut oqarpoq.
Kapitinnissaq siullerpaamik neqeroorutigineqarpoq usilersuisartunut, nassatanik uuttortaasartunut, timmisrtumi saqisunut timmisartortartunullu.
Kujataani Narsarsuarmiit avannaani Ilulissanut sulisut 120 aamma 130 akornannittut sapaatip akunnerani kingullermi nualluummut A-mut (H1N1) kapitipput.
Aamma peqqinnissaqarfimmi sulisut qitiusumik inissisimasut nualluummut A-mut (H1N1) kapitissimapput.
Tunillatsittut nutaat marluk
Inuit katillugit tallimat nualluummik A-mik (H1N1) tunillatsissimpput: Tasiilami marluk, Sisimiuni ataaseq maannalu aamma Aasianni marluk.
Napparsimasut nualluummik tuniluuttumik A-mik tunillatsittut amerliartuaarput, tunillatsissimasulli amerlanerujussuusinnaapput.
Taamatut naliliivoq nakorsaaneq Flemmint Kleist Stenz Peqqinnissamik Nakkutilliisoqarfimmeersoq: - Inuit taakkua tallimat takussutissaannaapput kikkut misissorneqarsimanersut tunillatsissimanersullu. Takussutissaanngillat nappaat sumi atugaanersoq.
- Naatsorsuutigaarput amerlanerusut tunillatsissimassasut, angerlarsimaffimminnili uninngasut uppernarsineqarsimanani nualluummik A-mik nappaateqartut, Flemming Kleist Stenz oqarpoq.