Ungasianiit kalaallisut ilinniartitsisarneq iluatsilluarpoq

Oqaatsinik Pikkorissarfiup ungasianiit kalaallisut immikkoortumi siullermi pikkorissartitai angusarissaarlutik naammassipput.

Pikkorissartut, ukiap ingerlanerani pikkorissarnermik sapaatit akunnerinik qulinik sivisussusilimmik malinnaasimasut amerlanersaasa, naggataarutaasumik misiliineq 95 - 100%-imik eqqortumik naammassisimavaat.

Pikkorissarnermi ullormut internettikkut pisassiisoqartarlunilu ullormut sms-ikkut suliakkiisoqartarpoq, tamakkulu pikkorissartut suliffimminni attavigisartakkatik ilagalugit suliarisarpaat. Suliffeqarfinnik inunnillu ataasiakkaanik pikkorissaasoqarsimavoq.

– Suliassat aalajaalluinnartumik ingerlanneqarsimanerat pkkorissartullu tunniusimassusiat ajasoorutigaakka, Oqaatsinik Pikkorissarfimmi ungasianiit ilinniartitsisoq Barfuss Ruge oqarpoq.

Taamaatiinnartoqarpiannginneranut pikkorissartut soqutiginninnerat attavigineqartartullu tapersersuilluarnerat aammalumi misiliisarnerit aalajangersimasumik periaaseqarluni ingerlanneqarnerat erseqqissumillu killiliisoqartarnera peqqutaasimagunarput..

Oqaatsinik Pikkorissarfiup neriuutigaa ungasianiit ilinniartitsinermi misilittakkat iluaqutigalugit ukiup upernaallu ingerlanerini nunatsinni oqaatsinik ilinniartitsisarneq sukataarunneqarnerulerumaartoq.

Taamatut eqqarsarnermi tunngavigineqarpoq, assigiinngitsunik oqaasillit ikioqatigiinnerusariaqarnerat allamiullu oqaasiinik ilinniarumassuseqarnerusariaqarneq. Attavigisartagaqartarneq sumiiffinniluunnit suliniuteqartarneq atorluarlugit ingerlatsisoqarsinnaavoq.

Pikkorissartut 20-it ukiumoortumik pikkorissarnerup immikkoortuisa aappaat februarimi aallartissavaat, ukiumilu nutaami kalaallisut ilinniarnissaq januarip 25-ianni aallartissaaq.

Powered by Labrador CMS