SIK: Aalajangersimasumik isertitaqarnerup suliffissuit sulisoqartissavai

SIK-p siulittaasua isumaqarpoq aalisakkerivinni sulisut pitsaanerusumik akissarsiaqalerpata aalaakkaasumik sulisussat qulakkeerneqassasut.

Sulisitsisut aalisakkerivinni sulisunik pitsaasunik atugassaqartitsigunik taava sulisartut pigiinnarnissaat ajornartorsiutiginavianngilaat. SIKip siulittaasua Jess G. Berthelsen taamatut kaammattuisoq, knr.gl allappoq.

- Uagut ilaasortagut aaqqissuulluakkamik suliffissanik neqeroorfigineqarpata, taava aalisakkeriviit sulisussaaleqinavianngillat, SIK-p siulittaasua Jess G. Berthelsen oqarpoq.

Royal Greenlandip Qasigiannguani tunitsivia ilaanneeriarluni sulisussaaleqisarpoq. Tamannalu Royal Greenlandip naatsorsuutaanut pitsaanngitsunut pissutaaqataasutut suliffeqarfiup pisortaa Flemming Knudsen nassuiaateqarpoq.

Tamatumunnga pissutaavoq maani nunami aalisakkeriviit sulisuminnik suliassaarukkaangata soraarsitsisarnerat. Taamaattumillu sulisut aalajaatsut pigiinnarsinnaanngilaat, SIK-p siulittaasua taamatut isumaqarpoq, taamaattorli isumalluarpoq.

- Januaarip aallaqqaataanit atuutilersumik tunisassiorfinni sulisut sulinermi nalaani unikkallarnerminni akissarsiaminnik ilanngaanneqartarunnaassapput.

Powered by Labrador CMS