Qarasaasiat orpiit ataaniittut amerlassapput
Spillerutit, qarasaasiat angallattakkat pinngussallu juullimi tunissutigiumaneqarnerpaanut ilaapput. Nunatsinni pisiniarfiit annersaat pingasut, Pisiffik, Brugsen aamma Pilersuisoq taama oqaluttuarput.
Naak nunarsuarmi aningaasarsiornikkut ajornartorsiortoqaraluartoq, siornamut naleqqiullugu niuffanneq minneruallaanngilaq, inuilli aningaasaatiminnik parsilluarnerupput, knr.gl allappoq.
Illoqarfinni anginerni imaluunniit nunaqarfinni avinngarusimanerusuni najugaqaraluaraanni qarasaasiat, spillit pinngussallu pisiniarfiutileqatigiinni tamani pisiariortorluarneqarput.
Brugsenimi, illoqarfinni arfineq-marlunni pisiniarfeqartumi, tuniniaanermut pisiassanillu pissarsiornermi pisortaq, Finn Christiansen, oqarpoq, inuit decembari tamaat tunissutissarsiniarsimasut.
- Legot ukioq manna tunisaalluarput. Aamma DVD-mik isiginnaarut angallattagaq, qarasaasiami pinnguaatit Nintendo Wii-mullu atortussat tjnisaalluarput. Kiisalu meeqqanut arnanulu atisat ingerlanneqarluarlutik, Finn Christiansen oqarpoq.
Pisiffik nunatsinni pisiniarfiutillit namminersortut annersaraat. Tassani pisisartut qarasaasiaq pinnguaat Nintendo Wii spillinullu atortut assigiinngitsut juullimi tunissutissatut nuannerinerpaavaat.
Notebook, qarasaasiaaraq, Pisiffiup illoqarfinni arfineq- marlunni pisiniarfiutaani pisiarineqarnerpaanut tulliuvoq.
Nintendo DS assiliissutitalik, meeqqanut mikinernut naleqquttoq, juullimi tunissutissatut Pisiffimmi pisiaanerpaat pingajoraat
Pisiffiup juullikkunni kaaviaartitat siornarnit ikinnerulaartut malugineqarsinnaasoq, suliffeqarfissuup pisiassanik pissarsiornermut nittarsaanermullu pisortaa, Morten Caspersen, oqarpoq.
Namminersorlutik Oqartussat pigisaat Pilersuisoq, nunarfinni tamangajanni illoqarfinilu mikinerni avinngarusimasunilu aqqanilinni pisiniarfiuteqarpoq.
Niuernemut pisortap Frederik Olsenip tunissutissatut tunisaanerpaat ima eqqaavai.
- Qarasaasiaarannguit ingerlalluarput. Aamma spillit assigiinngitsut iluarisimaarneqarput. Aamma tv-t tigulluarneqarput, kiisalu meeqqanut pinngussat ingerlalluarlutik, Frederik Olsen oqarpoq.
Sumiiffinni assigiinngitsuni tunitsiviit tunisassiorfiillu tamakkiisumik ammajunnaarsimanerat Pilersuisumi niuernermi pisortap malunnarnerarpaa.