Orpiliaq Rold Skov-imeersoq Tasiilamut
Ukiorpassuanngortuni ukiut tamaasa orpilissamik Rold Skov-imiit Tasiilamut nassiussisoqartarsimavoq.
Prinsesse Margrethe Børnehjem massakkut dronningiusup Margrethep 1957-imi taamanikkut Amassaliusumi ammarpaa.
Taamanerniilli kunngikkormioqarfik naalagaaffiup orpippassuaataanit orpilissamik inniminniisalersimavoq, nordjyske.dk allappoq.
Ukiorpassuarni kingullerni naalagaaffiup orpippassuaateqarfia Rold Skov, ullumikkut Skov- og Naturstyrelsen-iusoq, Himmerlandimiittoq kunngikkormioqarfiup meeqqanut avannaarsuaniittunut tunniussassaanik isumaginnittuusarsimavoq.
Prs. Margrethes Børnehjem 1957-imi septemberip 17-ianni atoqqaartinneqarpoq, 'Foreningen til hjælp for Grønlandske Børns's børnesanatorier'-taasa tallimassaattut.
Meeqqat angerlarsimaffiat 2007-imi nutaanik illutaqalerpoq taakkulu 16. maj 2008-imi atoqqaartinneqarput. Illuni nutaaniipput meeqqat najugaqarfii, illorsuaq susassaqartitsivik, illu teknikkut atortuusivik, pedelip sullivia kiisalu atortuusiviit allaffeqarfillu.
Angerlarsimaffik aamma innarluutilinnut immikkoortortaqarpoq, Nasippi, 20. november 1999-imi atoqqaartinneqartoq, sannavik illersugaasoq 'Qaaliaaq' nunaqarfimmilu Qernertivartinni tammaarsimaartarfik.
Meeqqat angerlarsimaffiat ullumikkut Kalaallit Nunaanni Namminersorlutik Oqartussat ataanniippoq.