Skip to main content

Danmarkimi juulli aputilik - Ilulissani aputeqanngitsoq

Paarlangasut. Danmarkimi 1900-ikkunniilli juulli aatsaat aputeqartiginiarneq Diskobugtimi aputaasattorujussuuvoq.

Danmarkimi nalunaaqutaq malillugu nalunaaqutaq 16 - pisortatigoortumik uuttortaasarfik - uuttortaanermi nunap 90 procentia apummik qallersimavoq - ukiuni 14-ini siullermeerluni Danmarkimi juullimi aputeqarluni. Nalunaaqutaq 16 nalunarunnaarpoq 2009-imi juullimi aputeqassasoq, 1900-ikkunniilli arfineq pingajussaannik taamaalluni.

– Danmarkimi sumiiffiit ikinnerpaartaanni sila issiganilu kiassanngilaq. Taamaattumik aput aangaarnavianngilaq, TV 2-mi silasiortoq Eva Nabe Poulsen oqarpoq.

Ulluni marlussunni sumiiffiit amerlanersaanni sila kialaareerpat issi sapaatip akunnerata tulliani uteqqissaaq:

– Ilimanarpoq sapaatip akunneraa naanera qaangiuppat issileqikkumaarpoq unnuami 3-4 gradinik issittarluni, kingusinnerusukkut immaqa 7-8 gradit tikittarlugit avannarpasinnerusortaani nillertumik isugutanngitsumillu anorlerluni, DMI-mi silasiortoq Lars Henriksen oqarpoq.

Ilulissani aputeqanngilaq

Qaqqat aqquserngillu aputeqanngillat ivikkallu ersiinnarlutik, juullimut aqaguttoq Ilulissani taamaappoq. Tamanna illoqarfimmi inuit naammagivallaanngilaat, knr.gl aput maqaasinasoralugu Ilulissani aqqusinermi inunnik apersuisimasoq allappoq.

– Isumaqarlunga maani aputeqartuaannartoq. Uanga Danmarkimeersuuvunga maanilu aputilimmi juullisiussangasimagaluarpunga. Allatulli ajornaqaaq, tamanna naammagisariaqassavara, Lis Holm oqarpoq.

Eqqumiitsuliortut sullivianni Jørgen uummataasamik ujamiliorpoq. Aput maqaasivaa, aputeqannginnerani aamma iluaqutaasutut isigalugu.

– Avaanngunaraluarluni ajunngilaq. juullimi aputeqartaraluarpoq, imaanngilarli taamaattuaannassasoq. Imaallaat qallunaat ukiormanna aputilimmi juullisiussapput, Jørgen oqarpoq.

Paninnguaq Kristensen aputilerujussuarmi jullisiortarsimanerminnik eqqaamasaqarpoq.

– Aputeqanngitsoq avaanngunarpoq. Meeraagallaratta ukiup taamaalinerani aputeqartangaarmat blokkini 2 salimiit ammut pissittartarpugut. Ullumikkut taamaaliorniaraluarutta nissugut talligullu nallussagaluarpagut, Paninnguaq oqarpoq.

Pisiniarfitoqqami umiarsualivimmiittumi angutit marluk issiallutik kaffisorujoorput. Aputeqannginnera ilanngullugu oqaluuseraat.

– Qanga taamaalinerani suna tamarmi qaqortuinnaasaraluarpoq. Silap pissusaasa allanngornerat peqqutaasimassaaq. Neriunniarta apiumaartoq, David Kristoffersen oqarpoq.

DMIp ulluni aggersuni Ilulissani nittaalissanerarpaa.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER