Myliusikkut juullisiutaat
Suaasat kinertuliat nersussuullu neqaa Danmarks Ekspeditionimi peqataasut 1906-imi Tunup avannaarsuami juullisiutigisimavaat. Juullimi nerisimasaat Ringkøbing Museumimi takuneqarsinnaapput.
Suaasat kinertuliat mandelillit immiarlu tungusunnitsoq. Nersussuup oqaa skinkelu eertanik qorsunnik akullugit. Slikasparges akvavitilu.
Mylius-Erichsen 1906-imi Danmarks Ekspeditonimi angalluni Tunup avannaarsuani juullisiormat nerisassat tamakuusimapput, pilitiken.dk allappoq.
Ukiut 100-it sinnerlugit siornatigut juullisiutigisimasaat juullip ukiortaallu akornanni Ringkøbing Museumimi erseqqinnerusumik misissorneqarsinnaapput, ilisimasassarsiorsimanermut tunngasut tassani ataavartumik saqqummersinneqarmata.
Nerisassat ilisimasassarsiortut igasuata Hans Ludvig Jensenip aaqqissuussimavai, nalliuttorsuarni nerilluartarnissaq pingaartitarisimagamiuk.
Juullimi nerisassat ilisimasassarsioqataasunut 28-nut nalunaaqutaq 16.00 sassaalliutigiuneqarsimapput, nalunaaqutaq 20.00 allakkanik agguaassisoqarsimavoq - kingornalu cigaat, kaffi kaagillu sassaalliutigineqarsimapput.
Katersugaasivimmi aamma Mylius-Erichsenip juullimut taalliaralugulu erinniaata allassimaffiat takuneqarsinnaavoq, taamatullu aamma Polarpost - ilisimasassarsiornermi peqataasut quianartunik imaqartillugu assaannarminnik allattarsimasaat takuneqarsinnaavoq.
Tunup avannaanut ilisimasassarsiorneq Danmarks Ekspeditionen 1906-08-mi ingerlanneqarpoq.