Tibet Kalaallit Nunaattut pineqarusuppoq

Dalai Lamap sinniisaa Danmarkimi naalakkersuisunit tapersersorneqarnissaq amigaatigaa. Tibetimiut atugaat kalaallit atugaannut assersuuppai.

Folketingep Kinamut nalunaarutigisimavaa Tibetimut oqartussaanera akueralugu. Tibet nunatdinnisut namminersulerusuppoq.Assi: Polfoto

Kinap Tibet pillugu politikia Danmarkip tapersersormagu, Tibetimiut ikinngutitik qallunaat ilisarisinnaanngingajappaat. politiken.dk taama allappoq, Dalai Lamap oqaaseqartartua Thubten Sandrup, Dalai Lamap Europap avannaanni sinniisigisaa oqaloqatigereerlugu.

– Eqqarsariarnartorujussuuvoq Tibetimiut imminnut oqartussaaffiginissaat toqqaannartumik akerlerineqarlunilu Tibetimiut inuiattut pisinnaatitaaffii oqaatsimik ataatsimilluunniit taaneqanngimmata, Politikenimut oqarpoq.

– Tibetimiut kalaallisuulli immikkut inuiaapput. Danmarkip kalaallit immikkut inuiaasutut akuersissutigisinnaagunigit taava aamma Danmarkimi oqartussaasut tibetimiut immikkut inuiaasutut akuerineqarumanerat tapersersortariaqarpaat, Thubten Samdrup oqarpoq.

Isumaqarpoq Kina ukiuni makkunani apeqqutit Tibetimut tunngasut pillugit sakkortuumik nunanik killernik sunniiniarsarisoq.

Powered by Labrador CMS