Kalaallit Nunaat pillugu ilinniarput
Vellev Skolemi atuartut mikinerit Kalaallit Nunaat pillugu sapaatip akunnera sammisaqarput.
Raajanik qalipaajaasoqarpoq, niaqqumik saanikuinnarmik miloriaqattaartoqarluni kiinarpaallu pillugit ilinniartoqarluni sapaatip akunnerata siuliani Vellev Skolemi Kalaallit Nunaat pillugu sammisaqartitsisoqarmat.
Atuartut mikinerit 3. klasse tikillugu Kalaallit Nunaanni oqaluppalaanik oqaluttuanillu tusarnaarput, Kalaallit Nunaanni uumasut, pinngortitaq nunallu pissusaannik ilinniarlutik, Favrskov Posten, allappoq.
Atuartut ilaatigut namminneq kiinarpassaminnik ujamissaminnillu sanapput, nunatsinneersunik raajanik qalipaajaallutik aammalu nunatta imartaaneersunik saarullittorlutik.
Kalaallit Illuutaat Århusimiittoq kaminnik, kamippannik allanillu nunatsinneersunik atuarfimmut atukkiussisimavoq.
Qanga piniartut piniutaat, soorlu unaaq, takutinneqartunut ilaavoq. Puisinniut taanna niviarsiaqqanik tupigusuutigineqaqaaq.