Ulapissaqaat
Akileraarutinut atugarissaarnermullu kommissionip nalunaarusiami ilaa upernaaru tunniuteriissavaa, taannalu politikkikkut oqallitsitsiniutaassaaq, siulittaasutut toqqagaaqqammersoq oqarpoq.
Akileraartarnermut atugarissaanermullu kommissioni Inuit Ataqatigiit, Demokraatit aamma Kattusseqatigiit Partiiata naalakkersuisooqatigiinnissamik isumaqatigiissutaanni immikkoortut piviusunngortinneqartut ilagaat.
Partiit taakkua pingasut juunimi isumaqatigiissutigaat sulissutiginiarlugu »innuttaasut atugarissaarnerisa nalinginnaasumik qaffassarnissaa, pingaartumik ilaqutariinni meerartalinni aningaasaqarniarnikkut atugassaqarnerlunnerpaani«.
Kommissionimi ilaasortat novembarimi siusinnerusukkut toqqarneqarput, siullermeersumillu ataatsimeereerput.
- Ulapippugut. Uagutsinnut suliassiissutigineqartoq annertoorujussuuvoq piffissaqarpallaanngilagullu, siulittaasoq, professori Torben M. Andersen, oqarpoq.
Suliassarlu annertoorujussuuvoq. Isumaginninnermut inatsisiliorneq tamarmi qulaajarneqassaaq tamannalu peqatigalugu akileraartarnermut inatsisit misissoqqissaarneqassallutik.
Aaqqissuussinerit ullumikkut atuuttut naammaginarpat, taamaanngippat qanoq isilluni allanngortinneqassappat pitsaanerulersillugit, aammalu malittarisassanik erseqqinnerusunik ajornaannerusunillu suliaqartoqarsinnaava, innuttaasunut suliarinnittunullu paasiuminarnerusunik?
Kommissionip aamma nalilissavaa akileraartitseriaaseq siunertalimmik aaqqissuunneqarsimanersoq, aningaasanik pissarsiniarnissaq eqqarsaatigalugu.