Angallannermut ataatsimiititaliaq: Timmisartorsuaq atuinnarli
Kommuneqarfik Kujallermi angallannermut ataatsimiititaliap Air Greenlandip Kujataani angallannermi allannguutissai oqaluuserai, ukiuunerani ilaasussat tamarmik Kangerlussuakkooqaartalissapput.
– Angallannermik ataatsimiititaliap Air Greenlandip Kujataanik sullissinera isorartorsiorpaat, innuttaasut, pisortat suliffeqarfiutaat, atuarfiit namminersorlutillu piginneqatigiiffiit sakkortuumik eqqorneqassapput. Kommunip ineriartoqqinnissaanut periarfissaat aserorluinnarneqassapput soorlu suliffeqarfinnik nutaanik kajumilersitsinissaq aamma innarlissasoq, Angallannermut ataatsimiititaliap siulittaasua Kaj Egede oqarpoq.
Air Greenlandip aningaasatigut aaqqissutissai imaapput, aasaanerani akikinnermik timmisartortoqartalersinaasoq ukiuuneranili akit akinit maannamut atuuttunit nikinnavianngillat.
– Siorna akit 33 procentimik qaffariarput, maannakkut akit aasaanerani apparneqartassapput kisiannili ukiuuneran akit qaffaseqisut taamaatiinnarlugit. Assigiinngisitsineruvoq najugaqavissunullu naapertuilluanngitsorujussuulluni taakkumi aasaanerani turistit akikitsumik angalasarnissaat akilissammassuk, Kaj Egede oqarpoq.
Angallannermut ataatsimiititaliaq taamaammat isumaqarpoq Kujataani ataqatigiilluni angallannermik aaqqissuussisoqartariaqartoq innuttaasunut tamanut iluaqqutaasumik, soorlu atlantiku ikaarlugu ukioq naallugu timmisartuussinissamik qulakkeerisussamik, aammali ilanngullugu silaannakkut angallannermik, imaatigut angallannermik aamma assartuinermik ataqatigiissaakkamik pilersitsisoqartariaqartoq.
– Ajorinngeqaarput Islandimut attaveqarnerput suli sakkortusarneqassammat, Angallannermik ataatsimiititaliap siunnersuisutut atuuttup siulittaasua Kaj Egede naggasiivoq.