Air Greenland ullumi sulisunik soraarsitsivoq
Air Greenlandimi sulisut ilisimaneqanngitsumik amerlassusillit ullumikkut soraarsitaanerminnik nalunaarfigineqarput.
Annonse
Air Greenlandimi sulisut arlallitt ullumikkut soraarsitaanerminnik ilisimatinneqarput. Paasissutissiisartup Pia C. Bang-ip tamanna AG-mut uppernarsarpaa.
Qaammat una siusinnerusukkut tusagassiortunik katersortitsilluni Air Greenlandip qullersaa Michael Binzer nassuiaavoq, timmisartorsuaq Kunuunnguaq tunineqarpat atorfiit 25-it matuneqartussanngussasut.
Air Greenlandilli ullumikkut soraarsitsineq 25-nik soraarsitsinissamut attuumassuteqannginnerarpaa, timmisartuutileqatigiiffiulli nalinginnaasumik annikillisaaneranut attuumassuteqarnerarlugu.
Pia C- Bangip oqaatigisinnaanngikkallarpaa ullumikkut qanoq amerlatigisunik soraarsitsisoqarnersoq, tamannali suliffeqarfiup iluani ilisimatitsissutaanerarlugu.