Hotel Arcticimi igasunngortoq saqisunngortorlu

Saqisoq Aqqaluk Nielsen igasorlu Inunnguaq Hegelund tallimanngormat Ilulissani Hotel Arcticimi svenditut allagartartaarput.

Saqisoq Aqqaluk Nielsen igasorlu Inunnguaq Hegelund tallimanngormat Hotel Arcticimi allagartartaarput. Ass.: Hotel Arctic.

Ilulissani Hotel Arcticimi ilinniagaqartitsineq ukiorpassuarni pingaartinneqarsimavoq, sulisullu 60-t sinneqartut tamangajammik ullumikkut kalaaliupput.

- Ilinniartutta ilinniagaqarnermik nalaani suliatigut qaffasissuusarnerat tulluusimaarutigaarput. Minnerunngitsumillu nuannaarutigaarput taamaasiornikkut Kalaallit Nunaanni akunnittarfimmik neriniartarfimmillu ingerlatsivinnut ilisimasalinnik ilinniartitseqataasinnaagatta, tamatumani pitsaassuseq ukiuni kingullerni annertuumik qaffassimalluni, Hotel Arcticip pisortaa Erik Bjerregaard oqarpoq.

Ilinniakkaminik naammassinneqqammersup aappaa Aqqaluk Nielsen 26-inik ukioqarpoq. Ilinniarfimmi holdimini viinninik ilisimasaqartuni kakkannersaasimaoq, assersuutissaallunilu kalaallit inuusuttut Danmarkimi naggataajusumik soraarummeernermi/svendeprøvernermi qanoq angusarissaartartiginerannut.

Igasoq 22-nik ukiulik Inunnguaq Hegelund nersualaaneqarluni angusivoq. 2007-imi pissartanngorniunnermi Kalaallit Nunaanni igasunngorniat pikkorinnersaattut inissippoq, pingajussaalu Hotel Arctic taamatut nersorniarneqarpoq.

Sapaatip akunnerani tullermi taanna inuussutissalerinermi ilinniarfimmut INUILI-mut aallaqqissaaq igasut ilinniarsimasut nunatsinni pissartanngorniunneranni oktobarip 31-anni ingerlanneqartussami peqataajartorluni.

Akunnittarfiup 2008-p 2009-llu ingerlaneranni inuusuttut arfineq-marluk saqisutut, igasutut, saaffiginnittarfimmiutut allaffimmiutullu ilinniagaqartissimavai. 2010-mullu iseriartulernermi inuusuttut allat qulingiluat ilinniartuupput.

Akunnittarfinni neriniartarfinnilu ilinniartoqarneq eqqarsaatigalugu Nuummi Hotel Hans Egede Hotel Arcticilu siuttuupput.

Powered by Labrador CMS